Kanë kaluar si pa kuptuar plotë 18 vite nga beteja e Prekazit, ku humbën jetën 59 persona, mes së cilëve edhe heroi legjendar Adem Jashari.
Këtë përvjetor në kryeqytetin e Shqipërisë është çelur një ekspozitë, në të cilën vizitorët mund të njihen nëpërmjet fotografive me figurën heroike të Adem Jasharit dhe të gjithë të rënët në datat 5, 6 dhe 7 mars të vitit 1998, në këtë betejë.
Mirëpo, siç duket kjo ekspozitë është braktisur nga vizitorët kryeqytetas, të cilët kanë qenë fare të paktë në numër. Sa u takon përfaqësuesve të politikës, ndër të vetmit që kanë vizituar ekspozitën ka qenë i ngarkuari me punë në Ambasadën e Kosovës në Tiranë, z. Ramiz Lladrovci si dhe ish kryeministri Sali Berisha, i cili përfitoi nga rasti i prezencës mediatike, për të lëshuar disa deklarata politike nga ambientet e Muzeut Historik.
Ekspozita me temë “Qëndresa heroike e Jasharëve për liri” është një organizim i përbashkët mes Muzeut Historik të Kosovës dhe atij të Shqipërisë. Vizitorët mund të gjejnë të ekspozuara armë të luftëtarëve, sende personale, veshje, siç janë pantallonat personale me gjurmë të gjakut të Shaban Jasharit, etj.
Nuk mungojnë pamjet nga lufta e Prekazit, apo të terrorit shtetëror të ushtruar nga serbët ndaj Jasharëve në mars të vitit 1998.
Në luftën e Prekazit më 6, 7 dhe 8 mars 1998 dhanë jetën për liri 59 persona, të cilët u shpallën Dëshmorë të Kombit. 55 prej tyre ishin nga Prekazi ndërsa 4 nga vendet e tjera të Drenicës.
Ekspozita do të qëndrojë e hapur deri më datë 11 mars, në oraret 10:00-13:00 dhe 17:00-19:00. Shpresojmë që kryeqytetasit të sensibilizohen dhe të lënë mënjanë sado pak ngjarjet politiko-kriminale të kohëve të fundit e të informohen mbi historinë, duke shtuar interesin për të tilla ekspozita./tesheshi.com/
