Zyra e kryeministrit turk ka dhënë një njoftim këtë mëngjes, ku bën të njohur se tre avionë luftarakë turq F-16 u ngritën në mesnatë nga baza e Dijarbakërit dhe goditën dy shtabe dhe një pikë grumbullimi të ISIS-it brenda territorit sirian.
Mësohet se avionët i realizuan goditjet e tyre nga Turqia, pa hyrë në hapësirën siriane. Objektivat e ISIS-it gjendeshin pranë fshatit Havar në Siri, karshi të cilit, në anën turke, është Kilisi.
Vendimi për goditjet qe marrë dje në mbrëmje, në një takim të jashtëzakonshëm mbi sigurinë, menjëherë pas përplasjeve në kufi, posaçërisht në Kilis.
I njëjti njoftim i dhënë sot i ka mëshuar vendosmërisë së Turqisë për të mos lejuar cenimin e sigurisë së saj, “Shteti i Republikës së Turqisë është i vendosur në marrjen e çdo mase paraprake për të ruajtur sigurinë e tij kombëtare.”
Me përshkallëzimin e situatës, Turqia ra dakort dje ta hapë bazën ushtarake të Inxhirlikut për avionët luftarakë të koalicionit kundër ISIS-it.
Po ashtu pajtimi mes Turqisë dhe SHBA-ve për aksion të përbashkët parashikon dhe një zonë të pjesshme të ndalim-fluturimit përgjatë kufirit turko-sirian.
Presidenti amerikan, Obama, në një bisedë telefonike me presidentin turk, e çmoi si shumë të rëndësishëm për SHBA-të sigurinë e Turqisë. Njëkohësisht ai falënderoi Turqinë për pengimin e luftëtarëve të huaj për të kaluar në Siri, si dhe bëri thirrje për veprime të përbashkëta kundër të gjitha organizatave terroriste. /tesheshi.com/
