Autobusi në pronësi të “Besa Trans BTB”, i cili u dogj në Bullgari, nuk ishte i licencuar për transport ndërkombëtar pasagjerësh apo për ndonjë lloj transporti tjetër, ndaj kësaj kompanie sot iu hoq leja e punës, njoftoi Ministria për Transport dhe Lidhje e Maqedonisë së Veriut.
Në deklaratë theksohet se mjeti nuk ekziston as në evidencën elektronike të lejeve të lëshuara për kryerjen e transportit të udhëtarëve brenda apo jashtë vendit, të mbajtur nga Ministria e Transportit dhe Post-Telekomunikacionit.
Ministria gjithashtu thekson se qeveria ka obliguar Inspektoratin që të bëjë kontroll të jashtëzakonshëm në kompaninë “Besa Trans”.
Paralel me këtë zhvillim, është dhe ai i dyshimeve se autobusi fatal transportonte karburant dhe fishekzjarre kontrabandë.
Ministri maqedonas Bujur Osmani ka bërë të ditur se identifikimi i trupave të viktimave në aksidentin e trafikut do të zgjasë shtatë ditë.
Pas kësaj, eshtrat e viktimave do të transferohen në Maqedoninë e Veriut dhe do t’u dorëzohen familjeve të tyre. /tesheshi.com/
