Arsene Wenger: Emirates Stadium ka ndikuar negativisht tek tifozët dhe lojtarët

Trajneri i Arsenalit, Arsene Wenger, ka deklaruar se shumë nga tifozët topçinj ende nuk po ndihen si në shtëpi në Emirates Stadium, dhe kjo ka ndikuar negativisht edhe tek lojtarët.

Klubi nga veriu i Londrës u zhvendos në vitin 2006 nga Highbury në Emirates, por gjatë kësaj periudhe kohore tifozët nuk kanë arritur të mësohen me shtëpinë e re të Arsenalit.

Trajneri francez ka folur për faqen zyrtare të klubit në lidhje me këtë çështje.

“Kur ju hyni në një stadium të ri duhet të ndiheni sikur të jeni në shtëpinë tuaj. Duhet të mendoni se ky është vendi ideal për ju. Stadiumet janë të ndërtuara nga historiku dhe përjetimet prej ndeshjeve të ndryshme. Mendoj se në këtë aspekt jemi në disavantazh, sepse tifozët nuk kanë shumë gjëra të tilla në stadiumin e ri, dhe kjo po ndikon negativisht edhe tek futbollistët,” ka theksuar Wenger.

Ai gjithashtu e pranon faktin se zhvillimi i ndeshjeve të Ligës së Kampionëve në Wembley gjatë fundit të viteve 1990 mund të ketë qenë një gabim.

“Ishte një problem vërtet i madh për ne. UEFA nuk pranoi që t’i zhvillonim ndeshjet në shtëpinë tonë në Highbury, dhe kjo ishte një pengesë për ne. Futbollistët tanë ndjeheshin shumë rehat në shtëpinë e cila ishte një tmerr për rivalët. Ndërkohë, kur luanim në fushën asnjanëse, gjithçka ishte më e lehtë për rivalët,” përfundon Wenger. /tesheshi.com/