Mensur Krasniqi
Pas 12 orëve bisedime intensive, partitë politike dakordohen për të gjitha pikat që dalin nga Marrëveshja e Përzhinës.
Pas takimit, lideri i VMRO-së dhe kryeministri Nikolla Gruevski shprehu kënaqësi nga arritja e dakordimi duke theksuar se qëllimi i tyre strategjik ka qenë të ketë zgjedhje më 24 prill.
“Unë jam shumë i kënaqur nga ajo që u arrit. Qëllimi ynë strategjik si parti ishte të betonohet data e zgjedhjeve, për çka LSDM pati tentime ta shtyejë, përkatësisht kërkoi të prolongohej, por ne nuk e lejuam atë dhe insistuam të mbetet 24 prilli dhe ia arritëm. Data për zgjedhje me ligjet që tani do t’i propozojmë në Parlament do të definohet se më 24 prill do të mbahen zgjedhjet e parakohshme parlamentare”, deklaroi Gruevski.
Lideri i LSDM¬së Zoran Zaev pas takimit tha se është arritur marrëveshje e cila sot duhet të legalizohet formalisht juridikisht në ligj në qeveri në të cilin definohen kompetencat e zëvendësministrave me të drejtë vetoje.
Sipas marrëveshjes, ministër i Punëve të Brendshme duhet të jetë Oliver Spasovski, i Punëve dhe Politikës Sociale Frosina Remenski, ndërsa për zëvendësministra është dakorduar që në Shoqërinë Informatike dhe Administratë të jetë Aleksandar Kiracovski, në Financa Kire Naumov dhe në Bujqësi, Pylltari dhe Ekonomi të Ujërave, Lupço Nikollovski.
“Sonte fitoi Maqedonia, nga sonte është fillim i ri për Maqedoninë dhe për të gjithë qytetarët e saj. Është arritur marrëveshje që nesër duhet të formalizohet legalisht dhe juridikisht. Gjatë kësaj periudhe duam ta demokratizojmë Maqedoninë, institucionet e Maqedonisë, mediumet, gjyqësorin sepse rritja e demokratizimin nëpër institucione do të thotë që të gjithë jemi fitimtarë”, tha kryetari i LSDM-së Zoran Zaev.
Ndërsa kryetari i BDI-së Ahmeti theksoi që nga kjo marrëveshje nuk ka as fitues, por as humbës, duke shtuar që përmbyllja e çështjeve të hapura paraqet zhvillim të mirë për vendin dhe për qytetarët.
“Përmbyllja e këtyre çështjeve nënkupton vazhdimësi të reformave strukturore në përputhje me Rekomandimet e BE-së, rikthim të stabilitetit politik dhe sigurisë në vend si dhe paraqet garancë për mbarëvajtje të zgjedhjeve të lira dhe të drejta. Të gjitha këto na rikthejnë fuqishëm në rrugën e integrimit EuroAtlantik që është prioritet absolut i qytetarëve tanë”, tha lideri i BDI-së.
Poashtu mbi marrëveshjen e re për dalje nga kriza politike nëpërmjet një qeverie kalimtare, foli edhe deputeti i PDSH-së Imer Aliu. Për PDSH-në sipas tij nuk ka aq rëndësi kjo marrëveshje meqë PDSH nuk është e përfshirë në qeverinë kalimtare, dhe vazhdon të mbetet opozitë e vetme e shqiptarëve.
“Ne nuk jemi pjesë e bisedimeve përsa i përket qeverisë së re dhe caktimit të ministrave. Kështu që ne ngelim opozitë, opozitë e vetme. Përsa i përket qeverisë dhe çështjes së emrave, do të duhet tu informojnë ata të cilët janë pjesë e këtyre bisedimeve. PDSH mbetet opozitë tashmë e vetme në këtë shtet. Ne nuk kemi besim që kjo marrëveshje të realizohet por mbetet përgjegjësi e atyre që janë pjesë e bisedimeve përsa i përketë qeverisë”, tha mes tjerash Imer Aliu nga PDSH-ja. /tesheshi.com/
