Udhëheqësi i mafias kalabreze, italiani Rocco Morabito, një kontrabandist droge i cili ka qenë në arrati që nga qershori 2019 pasi u arratis nga një burg uruguajan, u arrestua të hënën në Joao Pessoa, në Brazilin verilindor, raportuan autoritetet.
Rocco Morabito, i konsideruar drejtuesi i Ndragheta-s (mafia kalabreze), u kap “së bashku me një tjetër të arratisur italian” identiteti i të cilit nuk është zbuluar, pas një “hetimi të përbashkët nga Brazili dhe Italia”, tha policia federale braziliane.
Këta janë kriminelët më të kërkuar në Itali, sipas policisë braziliane.
“Që nga vitet 1990, ka pasur gjurmë të përfshirjes së Rocco Morabitos në organizimin e kontrabandës së drogës midis Brazilit dhe Evropës,” tha policia, e cila planifikoi një konferencë shtypi të martën për të dhënë detaje të operacionit.
Morabito, 54 vjeç, u arrestua me urdhër të Gjykatës së Lartë.
Drejtësia italiane ka kërkuar Morabiton që nga 1995 me akuzat e shoqërimit të paligjshëm dhe kontrabandës së drogës. Ai u dënua në mungesë me 28 vjet burg dhe më pas me 30 vjet.
Italiani, i cili konsiderohet si një nga kriminelët më të kërkuar në botë, u arrestua në vitin 2017 në një hotel në Montevideo pasi jetoi në vendpushimin uruguajan të Punti del Este për 13 vjet me një identitet të rremë.
Drejtësia uruguajane miratoi ekstradimin e tij në Itali në 2018, por në qershor 2019 ai arriti të arratisej nga burgu më i madh në Montevideo dhe që prej asaj kohe ishte në arrati. /tesheshi.com/
