La Liga e Spanjës ka probleme me racizmin, paralajmëroi trajneri Carlo Ancelotti pas skenave të pakëndshme që shënuan derbin mes Valencias dhe “klubit mbretëror” në të cilin vendasit mundën 1:0 Real Madridin në stadiumin Mestalla.
Ishte një lojë me tension të lartë, ku në fund të ndeshjes Vinicius Junior goditi Hugo Duro, duke u ndëshkuar me karton të kuq, raporton AFP.
Por sulmuesi brazilian u ankua për fyerje raciste nga tribuna gjatë gjithë ndeshjes dhe në një moment kamerat televizive e kapën duke i thënë pankinës së tij se nuk donte më të luante.
“Ajo që ndodhi të dielën ka ndodhur dhe herë të tjera, por jo në këtë mënyrë. Kjo është e papranueshme. Liga spanjolle ka probleme me racizmin. Vinicius nuk është problemi, Vinicius është viktima”, tha Ancelotti në konferencën për shtyp.
Courtois: Ne nuk mund ta tolerojmë këtë
“Përse mendoni se arbitri e ndërpreu lojën? Sepse publiku i bërtiti Vinicius se ai ishte një ‘idiot’? Arbitri e ndërpreu lojën sepse hapi protokollin për racizmin”, pohoi trajneri italian.
“Kur Vinicius u përjashtua, i gjithë stadiumi filloi të thërriste ‘majmunë, majmunë’. Jam shumë i trishtuar”, tha Ancelotti.
Shokët e tij të skuadrës dolën në mbrojtje të Vinicius.
“Në të gjitha stadiumet në Spanjë, njerëzit vazhdimisht nuk e respektojnë Vinicius-in”, u ankua Dani Ceballos.
“Nëse Vinny do të kishte thënë se po largohej nga fusha, unë do të kisha shkuar me të. Kjo është diçka që ne nuk mund ta tolerojmë”, shtoi Thibaut Courtois. /tesheshi.com/
