Nga Mensur Krasniqi
Kriza në Maqedoni sa vjen e thellohet. Në këto kushte, janë shtuar ata zëra në rradhët e politikës shqiptare që kërkojnë tërheqjen e Ali Ahmetit nga partneriteti me Gruevskin, pasi me gjasë mund të jetë një anije në mbytje e sipër, ndonëse atij mund t`i duket e kundërta.
Deputetja së BDI-së Ermira Mehmeti, thotë se BDI duhet ta marë patjetër këtë vendim për shkak se Gruevski është dhe kundër BE-së dhe NATO-s.
“BDI duhet të distancohet nga Gruevski një orë e më shpejtë, e kam thënë shumë herë deri me tani dhe po e përseris sot. Ne jemi parti pro-perëndimore, pro NATO dhe pro EU, logjikisht i bie që nuk kemi çfarë kërkojme në bllokun e partive anti-perëndimore, anti-EU dhe anti-NATO”, ka deklaruar Mehmeti.
Ajo ka theksuar se kryeministri Nikolla Gruevski manipulon me popullatën e Maqedonisë, andaj dhe sipas saj, ai u përgjigj në mënyrë shumë manipulative ndaj ambasadorëve të huaja se në Maqedoni vendos populli, e jo dikush tjetër.
“Mendoj se z.Gruevski abuzon me kategorinë popull kur thirret në emrin e tij, që është tipike për një lider populist. Sepse populli në Maqedoni është një koncept me shumë dimensione siç është ai ideologjik, etnik, gjuhësor e fetar. Prandaj, mendoj se ky koncept është objekt manipulimi nga një lider i cili është në perëndim dhe të vetmen mundësi për ta mohuar këte e ka pronësinë mbi popullin. Por, kjo qasje është e lexuar dhe e deplasuar”, ka nënvizuar Mehmeti.
Poashtu, edhe kryetari i posaemëruar i Shtabi Qendror Zgjedhor në rradhët e BDI-së, Bekim Neziri në një emision për Alsat-m deklaroi që nuk e përjashton mundësinë e daljes nga qeveria, nëse vëren se situata është pa kthim.
“Nuk përjashtohet mundësia që nëse vlerësojmë se situata është në rrugë pa kthim, të diskutohet dhe të vendosim për lëshim të qeverisë, edhe pse nuk besoj se ka për të arritur deri në atë fazë”, tha Neziri.
Ndërkaq, gazetari i Anadolu Agency, Bekim Buqi, i cili njihet si njohës i mirë i rrethanave politike në Maqedoni, daljen eventuale të BDI-së nga Qeveria e quan një utopi meqë shumë herë deri më tani zyrtarët e BDI-së kanë paralajmëruar se partia e tyre mund ta braktis qeverinë e udhëhequr nga Gruevski, mirëpo një gjë e tillë asnjëherë nuk ndodhi.
“ Momenti më i përshtatshëm ishte që BDI të dalë nga qeveria kur LSDM-ja nisi me publikimin e bombave, por partia e Ahmetit vendosi të mbështesë edhe më tej Gruevskin. Çfarë përfitimi do të kenë shqiptarët nëse BDI tash del nga qeveria. Kështu që askush nuk beson më në paralajmërimet e partisë së Ahmetit. Me mosdaljen e BDI nga koalicioni qeveritar dëshmon edhe njëherë se edhe funksionarët e BDI mund të akuzohen për krim dhe korrupsion, ngjashëm me ata te VMRO-DPMNE-së. Andaj është utopi të besosh se BDI do të largohet nga ekzekutivi”, deklaroi për tesheshi.com, Bekim Buqi.
Ndërsa për gazetarin me përvojë në sferën e politikës maqedonase, Afrim Tanallari, braktisja e qeverisë nga ana e partisë shqiptare në pushtet BDI-së, në këtë fazë të zhvillimeve të politikës së brendshme në Maqedoni, nuk do të kishte ndonjë efekt që do kontribonte në tejkalimin dhe imponimin e një zgjidhe të krizës aktuale politike, dhe se një vendim i tillë vetëm se do të komplikojë një proces politikë që mbikqyret nga faktori ndërkombtarë, BE dhe SHBA-të.
“Për momentin, vendi është nën një monitoring të detajuar nga faktori ndërkombtarë, dhe kjo është mirë jo për strukturat dhe aktorët kryesor politikë, por në dobi të qytetarëve, pa dallim përkatësisë etnike. BDI është e përfshirë në gupet e punës që po zhvillohen mes katër forcave politike, për tejkalimin e krizës dhe nga ky pozicion BDI duhet në maksimum të imponojë për zgjedhje cështjet me karakter etnik dhe të arrijë zgjidhje, të cilat janë penguar nga VMRO-DPMNE-ja, për një kohë, nga kur ajo është në pushtet. Dhe si e dyta: BDI mund të shfrytëzoj të gjitha mundësitë që i lejon Kushtetuta dhe pluralizmi politikë, për paralizim të sistemit shtetëror”, shprehet për tesheshi.com, Afrim Tanallari.
Ai shtoi se braktisja e institucioneve qeveritare, nuk nënkupton ‘shkop magjik’, përkundrazi, gjykon që vendimi final i BDI-së për të braktisur qeverinë apo formë tjetër për ti thënë VMRO-DPMNE-së dhe Nikolla Gruevskit se shteti nuk është pronë e tyre, do të mvaret nga epilogu i marrëveshjes së Përzhinos dhe duhet të jetë i koordinuar me aleatët SHBA dhe BE.
“Procesi euroatlantik është i devijuar dhe dyshohet se vendi po merr kahje dhe axhenda që nuk janë në drejtim të Uashingtonit dhe Brukselit. Për mendim timin, braktisja e institucioneve qeveritare nga ana e BDI-së,në atë kohë, do të alarmonte edhe faktorin ndërkombatrë për mos realizim të reformave që janë parakusht për aderim në BE”, përfundoi Tanallari. /tesheshi.com/
