NATO do të krijojë një komandë të re tokësore vitin e ardhshëm në Finlandë pranë kufirit rus me detyrën për të udhëhequr operacionet e forcave tokësore të Aleancës në Evropën veriore në rast të një konflikti ushtarak, tha të premten ministri finlandez i Mbrojtjes.
Finlanda iu bashkua NATO-s vitin e kaluar, në përgjigje të pushtimit të plotë nga ana e Rusisë fqinje ndaj Ukrainës që filloi në vitin 2022 dhe po organizon praninë e Aleancës në territorin e saj.
“Këtë mëngjes vendosa që ne do t’i propozojmë NATO-s të krijojë një komandë në bashkëpunim me Shtabin e Ushtrisë në Mikkeli,” tha ministri Antti Hakkanen, në vijim të njoftimit të tij në qershor se të gjitha vendet anëtare të NATO-s kishin dhënë pëlqimin e tyre politik për planin.
Shtabi, të cilin NATO e quan Komanda e Komponentit Tokësor të Korpusit, do të operojë nën Komandën e Forcave të Përbashkëta me bazë në SHBA në Norfolk dhe së bashku me Komandën e Forcave Tokësore Finlandeze tashmë të vendosura në Mikkeli, rreth dy orë me makinë nga kufiri finlandez-rus.
Hakkanen, duke folur në një konferencë për shtyp, tha se njësia fillimisht do të ketë një buxhet vjetor prej 8.5 milionë euro dhe do të përbëhet nga disa dhjetëra zyrtarë ndërkombëtarë.
Në fillim të këtij muaji, Finlanda dhe Suedia fqinje, e cila dhe kjo e fundi gjithashtu iu bashkua Aleancës këtë vit, thanë se Suedia do të koordinojë vizitat e trupave të huaja të NATO-s dhe stërvitjet ndërkombëtare në Finlandën veriore. Megjithatë, Helsinki nuk kërkon të njëjtin lloj forcash të përhershme shumëkombëshe të dislokuara, për shembull, në shtetet fqinje baltike, duke pasur parasysh madhësinë e konsiderueshme të forcave të Finlandës. /tesheshi.com/
