Nuk thonë kot se një mollë në ditë mban doktorin larg. Ky frut ka përbërës të shumtë ushqyes e shërues. Është e pasur me natrium, hekur, fosfor, disa alkaloidë, geraniol, acetaldehid, pektinë, sheqer, thartirë të mollës, në sasi të vogla ka dhe vajra eterikë, ndërsa nga vitaminat dallohet vitamina A, B dhe C.
Përpos që përdoret si pemë freskuese dhe për përgatitjen e lëngjeve të ndryshme dhe uthullës, molla përdoret edhe për përgatitjen e çajeve të ndryshme shëruese.
Përgatitja e uthullës së mollës
Merren 5 kg molla të egra (bën edhe të buta) të pa spërkatura me kimikalie, lahen mirë, prehen dhe bluhen me makinë të thjeshtë për bluarjen e mishit. Masa vendoset në enë të emaluar, kavanoz, qelq etj, dhe mbushet me ujë aq sa ta lagë masën e bluar.
Në këtë sasi mund të vendosen edhe 20-50 g sheqer të bluar. E tëra mbulohet me gazë dhe vendoset në vend të nxehtë (dimrit) ose në vend me diell, për 20 ditë. Gjatë kësaj kohe, vetvetiu me nxehjen e masës, përfitohet uthulla e mollës, e cila vendoset në shishe (e kulluar) dhe ruhet në vend të ftohtë e të errët.
Ja edhe një mundësi për përgatitjen e uthullës së mollës:
Lëvoret e mollëve të qëruara në përpjesëtim 1:1 duhen vendosur në një kavanoz më të madh (1 kg lëvore me 1 litër ujë). Sipër lëvoreve vendoset uji i sheqerosur (sipas dëshirës). Kavanozi mbyllet me pece pambuku. Pas 3 – 4 javëve fitohet uthulla e mollës. /tesheshi.com/
