Nuk është pritur rezultat tjetër veç fitores për partinë Rusia e Bashkuar, që drejtohet nga kryeministri Dmitry Medvedev, por themelet e së cilës i ka hedhur Vladimir Putin.
Siç raporton Russia Today, me 90 për qind të votave të numëruara në zgjedhjet për Dhomën e Ulët dhe për një sërë drejtuesish rajonalë, Rusia e Bashkuar kryeson thellë, me 54.2 për qind.
E dyta në këto zgjedhje renditet Partia Komuniste, e cila ka marrë 13.5 për qind të votave, diçka më shumë se Partia Liberaldemokrate, që vjen e treta.
Presidenti Putin dhe kryeministri Medvedev kanë vizituar zyrat e fushatës elektorale të partisë Rusia e Bashkuar. Fillimisht ka qenë kryeministri ai që e ka quajtur rezultatin fitore për partinë, duke falënderuar gjithashtu Putin-in, themeluesin e partisë, për mbështetjen e treguar me këtë vizitë.
Presidenti Putin ka folur gjithashtu në ambientet partiake, duke thënë se populli rus kërkon stabilitet politik. “Situata nuk është e lehtë, e njerëzit e shohin atë. Ata duan që shoqëria dhe sistemi politik të jenë të qëndrueshëm.”
Katërmbëdhjetë parti morën pjesë në zgjedhjet për Dumën, ndërkohë që pjesëmarrja në zgjedhje nuk ka qenë e lartë. /tesheshi.com/
