Zgjedhjet në Kosovë, njihuni me kandidatët fitues pa balotazh, mes tyre dhe një turk

Nga Blendi Gashi

Shtatë kandidat të partive shqiptare, dy kandidat të pavarur, nëntë kandidat të partisë së komunitet serb, dhe një kandidat i partisë turke kanë fituar mandatin e kryetarit të komunës në zgjedhjet lokale të 22 tetorit pa pasur fare nevojë të shkojnë në raundin e dytë.

Padyshim se befasia më e madhe është LDK-ja e Isa Mustafës e cila ka fituar katër komuna pa balotazh, ndërsa ka gjasa ta fitojë edhe të pestën (Podujevën) që me 95 % të votave të numëruara kandidati i saj Agim Veliu prinë me 48 %.

Pas saj renditet AAK-ja e Ramushit e cila ashtu siç pritej ka fituar dy komuna në Dukagjin qysh në raundin e parë, PDK-ja një në Drenicë, Lista Serbe nëntë komuna të veriut, dhe një komunë Partia Demokratike Turke.

4 kandidatët e LDK-së që fituan pa balotazh

Gazmend Muhaxheri, kandidat i LDK-së në Pejë është befasia më e madhe pasi ka fituar në raudin e parë duke turpëruar AAK-në që tentonte të rikthente këtë qytet që e qeverisi për dy mandate.

Ai ka marrë 50.35 % apo gjithësejt 21.490 vota.nga 99.24% të vendvotimeve të numëruara.

Imri Ahmeti, kandidat i LDK-së për Lipjanin poashtu ka shkaktuar një befasi pasi ka rimarrë mandatin e dytë pa balotazh.

Ai ka marrë 59.57 % apo 16.123 vota nga 97.56% të votave të numëruara

Sokol Haliti, kandidat i LDK-së për Vitinë ka fituar edhe një mandate këtë herë pa balotazh pasi ka fituar 52.98% apo 10.402 vota të qytetarëve nga 96.97 kuti të numëruara.

Burim Berisha, kandidati i LDK-së ka fituar mandatin e tretë në Fushë Kosovë pasi ka fituar 63.41% apo gjithësejt 80103 vota nga 86.67% e kutive të numëruara.

2 kandidatët e AAK-së që fituan në raundin e parë

Ashtu edhe siç pritej AAK-ja ka mbajtur primatin e të parës në komunat nga vije Ramushi të cilat i qeveris për vite.

Bashkim Ramosaj, kandidat i AAK-së për Deçanin nuk ka lejuar befasi dhe ka fituar pa balotazh pasi ka marrë 64.36% apo 10.302 vota të qytetarëve nga 100% e kutive të numëruara.

Edhe Agron Kuçi kandidat për Junikun ka kryer punën në raundin e parë duke fituar mandatin e dytë si kryetar. Ai ka marrë 58.40 % apo 1.442 vota të qytetarëve nga 100 % kutitë e numëruara.

Drenasi shpëton me fytyrë PDK-në

PDK-ja e Kadri Veselit edhe në këto zgjedhje ka dëshpëruar pasi ka fituar vetëm një komunë pa balotazh.

Kandidati i Drenasit, Ramiz Lladrovci ka shpëtuar sadopak fytyrën e kësaj partie duke mos lejuar ndonjë befasi sikur në zgjedhjet e parakohshme të dhjetorit të kaluar kur nuk arriti të fitojë në raundin e parë.

Lladrovci këtë herë ka “shkel” të gjithë kandidatët pasi ka marrë 59.34% apo 13.124 vota të qytetarëve nga 95.34 % të kutive të numëruara.

Dy të pavarurit që nuk lejuan kurrfarë befasie

Për dallim nga disa të lartcekurit që befasuan me fitoren në raundin e parë, i pavaruri për Hanin e Elezit, Rufki Suma ashtu edhe siç pritej ka fituar pa vështirësi mandatin e tretë dhe atë pa përkrahje të asnjë partie, pa shpenzime për fushata të mëdha. Këtë fitore të pritur ai e ka arritur falë punës së tij dhe modelit që ka ndërtuar ndër vite, si i vetmi politkan pse jo në trevat shqiptare që nuk i vije era korrupsion.

Suma ka marrë 57.32% apo 2.823 vota nga të gjitha kutitë e numëruara, duke lënë të dytin kandidatin e PDK-së Florim Shkreta me 35.09% apo 1.728 vota.

Pa balotazh ka fituar në Skenderaj edhe i pavaruri Bekim Jashari, djali i Hamëz Jasharit. Fitorja e tij pritej pasi kjo komunë nga paslufta është udhëhequr nga  PDK-ja dhe Jashari përveç përkrahjes që kishte nga kjo parti, mori mbështetje edhe nga NISMA, por edhe për kontriubtin e pazëvendësueshëm që ka dhënë familja heroike nga Prekazi për çlirimin e vendit.

Jashari ka marrë 85.59% apo 13.111 vota të qytetarëve nga 94.74 % e kutive të numëruara.

Lista Serbe fiton këto komuna pa balotazh

Pa balotazh disa komuna të banuara me shumicë serbe ka fituar edhe partia Lista Serbe që dirigjohet nga Boegradi.

Bratislav Nikoliq i kësaj partie ka fituar komunën e Shtërpcës me 74.02% apo 5.636 vota nga të gjitha kutitë e numëruara.

Zoran Todiç ka fituar Leposaviqin me 62.18% apo 3.942 vota nga 87.10% e kutive të numëruara.

Svetislav Ivanoviq ka fituar Novobërdën me 54.97% apo 2.490 vota nga 96.36% e kutive të numëruara.

Stevan Vuloviç ka fituar Zubin Potokun me 80.19% apo 2.477 vota nga 86.67 % e kutive të numëruara.

Srdjan Popoviç ka fituar Graçanicën me 87.88% apo 6.040 vota nga 93.75 kuti të numëruara.

Gradimir Mikiç ka fituar Ranillugun 77.62 % apoo 2.279 vota nga të gjitha kutitë e numëruara.

Gragan Petkoviç ka fituar Parteshin me 58.95% apo 1.511 vota nga tëgjitha kutitë e numëruara.

Goran Rakiç ka fituar Mitrovicën e Veriut me 66.97% apo 5.157 vota nga të gjitha kutitë e numëruara.

Vucina Jankoviç ka fituar Zveçanin me 69.26 apo 2.514 vota nga 92.31 e kutive të numëruara.

1 komunë pa balotazh e fiton edhe partia e Jagxhilarit

Pa balotazh ka fituar një komunë edhe Partia Demokratike Turke (KDTP) që drejtohet nga Mahir Yagxhilar, ministër i Administratës Publike.

Mamusha, komunë kjo me shumicë turke, në katër vitet e ardhshme do të udhëhiqet nga Abdulhadi Krasniç që ka marrë 53.95% apo 1326 vota nga të gjitha kutitë e numrëruara, duke befasuar ish-kryetarin, Arif Butuc, njëherit kandidat i partisë së re të Turqve që 43.94% apo 1.080 vota. /tesheshi.com/