Edhe në zgjedhjet e sotme nuk do të mund të votojnë më shumë se gjysma e shqiptarëve me të drejtë vote.
Arsyeja është jo për faj të këtyre qytetarëve, por për fatin e një pjese, ndoshta më vitalen që ndodhen në mërgim në gjithë këto vite të tranzicionit të gjatë.
Teorikisht të gjithë shtetasit shqiptarë kanë të drejtë të votojnë, por që ta bëjnë këtë diaspora jonë duhet të marrë rrugën, lërë punën, të shpenzojë, të vijë të votojë e të kthehet, ndërkohë që vende të tjera e kanë zgjidhur ndryshe.
Në listat e zgjedhësve janë regjistruar gjithsej 3.382.295 votues, por më pak se gjysma e tyre votojnë rregullisht në zgjedhjet parlamentare dhe vendore. Në votimet për pushtetin lokal të 8 majit 2011 kanë votuar në Shqipëri gjithsej 1.571.096 qytetarë, pra 1.811.199 zgjedhës më pak. Shtetet e botës e kanë zgjidhur në mënyrë të qartë këtë çështje, madje edhe Maqedonia problematike.
Mërgimtarët votojnë atje ku jetojnë dhe vota vjen në vend e numërohet nga Komisioni Qendror i Zgjedhjeve. Turqia në zgjedhjet e fundit parlamentare e praktikoi këtë votë dhe nuk doli rezultati i përgjithshëm pa u numëruar vota e diasporës.
Në Itali, vota e italianëve që jetojnë jashtë vendit, madje edhe në Amerikën Latine ku kanë ikur prej gati 2 shekujsh ishte vendimtare për zgjedhjen e qeverisë së Romano Prodit në vitin 2006.
Në fakt me votën e emigrantëve në Shqipëri është luajtur shumë. Një pjesë e tyre sillen në mënyrë të organizuar, kryesisht nga Greqia për të ndikuar në rezultatet e zgjedhjeve në bashki të caktuara si ato të Himarës apo zonave të tjera kryesisht të banuara nga minoriteti grek për të kontrolluar influencën politike.
Por ka pasur raste kur emigrantët, me mbështetjen edhe të partive politike kanë ardhur me motivim për të votuar, siç janë zgjedhjet parlamentare të vitit 2013 ku PS bindi një numër të madh mërgimtarësh, kryesisht që jetojnë në Greqi që të vijnë për të votuar në vendin e tyre. Por kjo është një zgjidhje e sforcuar pasi i pengon ata që të vazhdojnë veprimtaritë jetike. Të gjithë kanë premtuar që të ligjërojnë votën e emigrantëve, por kjo asnjëherë nuk ka ndodhur…
/tesheshi.com/
