Ka marrë fund thuajse një javë në nivelin më të lartë të alarmit në Bruksel, pasi autoritetet belge kanë vendosur ta zbresin atë, duke e bashkuar kryeqytetin për nga gjendja e sigurisë me pjesën tjetër të vendit.
Qendra kombëtare e krizave e mori vendimin të enjten, duke e zbritur alarmin nga niveli i katërt, që nënkupton një kërcënim shumë serioz të afërt, në nivelin tre, çka do të thotë se bëhet fjalë për një kërcënim serioz të mundshëm.
Forcat policore dhe ushtarake do të jenë ende në patrullim në rrugët e Brukselit, por në një numër më të vogël. Me punën të nisur pjesërisht të mërkurën pas katër ditëve të mbyllur plotësisht, metroja do të funksionojë normalisht nga dita e sotme.
“Situata është serioze, por jo aq kërcënuese sa ç’u vlerësua më herët,” deklaroi kryeministri i vendit në një konferencë shtypi.
Pas sulmeve të 13 nëntorit në Paris, Belgjika, e posaçërisht Brukseli, është ndikuar më tepër prej tyre. Në vend vijon prej ditësh kërkimi i një prej personave të dyshuar për pjesëmarrje në aktet terroriste të Parisit, teksa kryeqyteti kaloi një fundjavë tërë ankth, për shkak të kërcënimeve për sulme dhe pezullimit gati të plotë të jetës. /tesheshi.com/
