Serbia pritet të këmbëngulë për caktimin e një dite të përbashkët përkujtimore të viktimave të konfliktit në hapësirën e ish-Jugosllavisë, e kjo me nismë të kryeministrit serb Aleksandar Vuçiç që duket nuk e ka “kapërcyer” refuzimin e disa vendeve të rajonit.
Aleksandar Vuçiç deklaroi se nisma është shumë e rëndësishme për rajonin dhe nuk ka të bëjë me manovra marketingu politik, siç është akuzuar.
“Nuk jam zmbrapsur nga përgjigjet negative dhe do të vazhdoj të këmbëngul në këtë. Na takon neve që të japim gjithçka nga vetja dhe të bëjmë përpjekje maksimale për të ruajtur paqen dhe stabilitetin në rajon”, ka thënë Vuçiç, sipas asaj që raportojnë mediat serbe.
Vuçiç është shprehur i bindur se në fund ideja e tij do të triumfojë dhe do të mbështetet nga të gjithë.
Ishte Vuçiç që paraqiti idenë e tij të ditës së përbashkët përkujtimore për ta konkretizuar në samitin e Vjenës, por zëvendëskryeministri i Kosovës, Hashim Thaçi, ishte i pari që e hodhi poshtë këtë ide. “Pretendimi i lidershipit serb për relativizimin dhe rishkrimin e historisë dhe barazimin e atyre që nxitën, organizuan dhe kryen gjenocid me ata që u mbrojtën në vendin e vet, nuk është njerëzor dhe nuk i shërben pajtimit”, shkroi Thaçi. Pas tij, edhe kryeministri kroat, Zoran Millanoviç, ka thënë se nuk mund të pranojë propozimin e Vuçiç, pasi Kroacisë nuk mund t’ia imponojnë as ditët e festës e as të zisë. /tesheshi.com/
