Serbia do t’i dërgojë një kërkesë komandantit të KFOR-it për të lejuar dislokimin e ushtrisë dhe policisë serbe në Kosovë, tha së fundi presidenti serb Aleksandar Vuçiç.
Vuçiç e tha këtë në ditën kur përfaqësuesit e serbëve në veri të Kosovës ngritën barrikada, duke protestuar kundër arrestimit të ish-policit kosovar Dejan Pantiç.
Ditët e kaluara në veri të Kosovës janë shënuar një sërë incidentesh, ku policia e Kosovës ka shtuar prezencën e saj. Përfaqësuesit serbë kanë bojkotuar institucionet e Kosovës që nga nëntori.
Vuçiç tha se Serbia po e paraqet kërkesën për vendosjen e ushtrisë dhe policisë “në përputhje me Rezolutën 1244 të Këshillit të Sigurimit të Kombeve të Bashkuara”.
Presidenti i Serbisë tha se në rezolutë “pa mëdyshje thuhet se kjo kërkesë duhet pranuar”, dhe se “konfirmon se ushtria dhe policia serbe do të lejohen të kthehen në territorin e Kosovës për të kryer disa funksione”.
Ai tha se “kthimi i forcave të sigurisë nuk është një mundësi”, por Rezoluta “krijoi një obligim për KFOR-in që të mundësojë kthimin e tyre”.
“Deri më sot nuk ka pasur asnjë diskutim me KFOR-in për kthimin e ushtrisë dhe policisë serbe”, tha Vuçiç.
Vuçiç tha se ai “nuk ka iluzione” se KFOR-i do ta pranojë kërkesën e Serbisë dhe se “e di se ata do ta refuzojnë atë kërkesë, edhe pse duhet ta pranojnë”.
“Ata do të gjejnë arsye të panumërta për të cilat do të na informojnë se nuk është e nevojshme dhe se janë plotësisht në kontroll (të situatës), edhe pse nuk kanë të drejtë ta bëjnë këtë. Ne do të kërkojmë lëvizje të reja ligjore që do ta udhëheqin Serbinë në të ardhmen. Lufta jonë formale-juridike nuk ka ardhur ende”, tha Vuçiç. /tesheshi.com/
