Abdulhadi Arvani, një shtetas dhe predikues sirian, u gjend të martën i vrarë në makinën e tij në veriperëndim të Londrës, dhe policia dyshon se Beshar Esadi mund të ketë gisht në vrasjen.
Arvani kërkohej prej 33 vitesh nga regjimi i Esadit, dhe ishte një prej kritikëve më të ashpër të klikës sunduese në vendin e tij.
I ndjeri e pati lënë Sirinë në vitin 1982, pasi i ati i Beshar Esadit pati nisur një fushatë të përgjakshme, gjatë së cilës lanë jetën mijëra njerëz. Arvani humbi prindërit dhe vëllezërit në masakrën më të rëndë në historinë moderne të Sirisë. Vetë personi në fjalë u dënua me vdekje në moshën 16-vjeçare, por mundi të shpëtonte, duke përfunduar në Angli.
E tronditur pas ngjarjes, familja e Arvanit e përshkroi atë si, “njeriun më paqësor që do të dëshironit ta takonit”.
Hetimi për ngjarjen është ende në hapat e para, dhe ende nuk ka një pistë të qartë, por të shumta janë dyshimet e hedhura mbi regjimin sirian. /tesheshi.com/
