Pas shqiptimit të fjalës “gjenocid” nga Papa në meshën e së dielës në Vatikan, tensioni mes Selisë së Shenjtë dhe Turqisë ka qenë i lartë. Një pjesë e mirë e ofiqarëve turq i kanë cilësuar të papranueshme komentet e Papës, por dje ka ardhur reagimi më i ashpër.
Rexhep Tajjip Erdogan, presidenti i Turqisë, ka shfrytëzuar një takim të Asamblesë së Eksportuesve Turq (TİM) për të shprehur kundërshtinë e tij të fortë ndaj fjalëve të Papës.
“Kurdo që politikanët, funksionarët fetarë, marrin përsipër detyrat e historianëve, shpërfaqet përçartja, dhe jo faktet. Prandaj dëshiroj të përsëris thirrjen tonë për të ngritur një komision të përbashkët historianësh, dhe theksoj se jemi gati të hapim arkivat tona. Dua ta paralajmëroj Papën të mos e përsërisë këtë gabim, dhe e dënoj atë,” u shpreh Erdogani.
Presidenti turk tha se sjellja e Papës gjatë vizitës së tij në nëntor në Turqi ishte e ndryshme, dhe e quajti atë politikan. “Vini re se nuk e quaj atë një udhëheqës fetar, por një politikan,” qenë fjalët e Erdoganit.
“Ne nuk do të lejojmë që incidentet historike të nxirren nga konteksti i tyre i njëmendtë dhe të përdoren si një instrument për të bërë fushatë kundër vendit tonë,” shtoi me ton të ashpër ai.
“Një politikan italian u shpreh mjaft mirë, duke thënë se ata nuk do të zgjedhin anë në çështjen. Kur armenët u vranë në vendin tonë, bijtë otomanë u masakruan gjithashtu nga armenët dhe popujt e tjerë,” qartësoi presidenti. /tesheshi.com/
