Nuk ka shprehje më adekuate të boshësisë identitare të Bashës se sa prirja e tij për të jetuar e gjithashtu servirur në publik realitete virtuale të vetvetes, pra gjëra të mosqena, të cilat janë dëshirë e tij po jo realitet.
Nuk është thjesht një gënjeshtar i rëndomtë për ca gjëra lehtësisht të qarta ose të lehtësisht të verifikueshme. Pra është më tepër se kaq, ose dhe më keq se kaq. E fundit e tij qe pretendimi se ai ka qenë gjithnjë i hapur me drejtësinë, i gatshëm të ballafaqohet me të. E tha këtë teksa po komentonte arrestimin e ish-ministrit Koka. Në këtë kuadër iu përmend Rruga e Kombit e ai dha këtë përgjigje:
“Jam i vetmi që jam përballur me drejtësinë dhe që ajo çështja e mori përgjigjen e vet. Ajo çështje e mori përgjigjen e vet dhe ishte një sulm i keqorganizuar politik. E keni harruar? Ishte qesharake akuza.
Ajo nuk u konsideruar as akuzë. Vendimi konkludoi se prokuroria nuk arriti që ngrinte asnjë akuzë. Unë kam kërkuar edhe të më hiqet imuniteti, kam dalë para shqiptarëve sa herë jam akuzuar.
Kam qenë para drejtësisë dhe në dispozicion, prandaj jam kështu sot, ballëhapur pa askujt për t’ju trembur veç Zotit”.
Në të vërtetë, kjo është hera e parë e tij që flet për akuzën që i është bërë për Rrugën e Kombit, e cila ka të veçantë faktin se nuk i është bërë nga politika por nga një teknokrat jashtë politikës. Dosja e Rrugës së Kombit është e gjitha teknike, pasi është bërë nga inxhnier Arben Meçe, një ish-dhjetorist, por kurrë me angazhime politike. Opozita e kohës ka marrë prej tij akuzën, e megjithatë s’e ka patur kuazë. Ka qenë ndër akuzat më periferike që lëshonte ndaj qeverisjes “Berisha”.
“Unë kam kërkuar edhe të më hiqet imuniteti, kam dalë para shqiptarëve sa herë jam akuzuar”.
Kur ka ndodhur kjo? Nuk ka asnjë deklarim të Bashës për vetëheqje imuniteti, ashtu siç nuk ka kurrë “dalje sa herë është akuzuar”. Se fjala vjen, ka bërë ndonjë dalje për 21 Janarin? Kurrë! Hera e parë që e ka përmendur ka qenë ajo e para pak ditëve, duke ia kujtuar Berishës, pasi ky i fundit u fut në selinë e PD-së për t’i treguar forcën.
Nuk ka dalë kurrë gjithashtu për Marrëveshjen e Detit me Greqinë. Madje përbën një rekord fakti se, për një ndër çështjet më të ndjeshme politike të dy dekadave, firmosësi i saj në asnjë rast nuk e ka trajtuar apo bërë avokatinë. Ia ka lënë Berishës ta bëjë këtë gjë.
Ndërkohë, media pranë Berishës ka publikuar së fundi faktin se drejtësia belge e ka kërkuar katër herë që të dëshmojë për çështjet “Toyota”, porse ai s’është paraqitur.
Nuk ka asnjë diskutim se raporti i Bashës me drejtësinë ka vesin e Berishës, siç ky ves shfaqet dhe te prirja për sajim realitetesh që s’ekzistojnë ose nuk kanë ekzistuar, pra tërësisht virtuale.
Kujtojmë se kohë më parë do deklaronte se në vitin 2006 i kish kërkuar Ramës ballafaqim televiziv. Pa qenë e nevojshme të pohohet se në kujtesën gazetareske por dhe në atë të opinionit nuk ekziston një ofertë e tillë sfiduese, mjaft të thuhet se nuk ka patur asnjë arsye logjike që të ndodhte kjo. Pozicionet e Bashës dhe Ramës në vitin 2006 nuk kishin asnjë lidhje me njëra-tjetrën, asnjë pikëtakim. /tesheshi.com/
