Një barkë e mbushur me refugjatë është mbytur herët këtë të premte në brigjet turke të Egjeut. Ngjarja ndodhi në bregun perëndimor të Çanakalesë, në Ajvaxhëk, ndërsa një barkë me refugjatë po lundronte drejt ishullit grek Lesbos.
Katër fëmijë humbën jetën në këtë incident të radhës, ndërsa 19 persona të tjerë që gjendeshin në barkë u shpëtuan.
Roja Bregdetare Turke ka shpëtuar 340 refugjatë vetëm në 24 orë në bregun perëndimor të vendit, prej nga barkat me refugjatë nisen drejt ishujve grekë.
Shumë prej refugjatëve, posaçërisht nga Siria, zgjedhin brigjet e Egjeut në Turqi për të kaluar më pas në ishujt grekë, e për të vazhduar udhëtimin e tyre të mundimshëm, që shpesh përfundon në mënyrë tragjike.
Sipas Organizatës Ndërkombëtare për Emigracionin IOM), më së paku 3.138 refugjatë kanë humbur jetën vetëm nga fillimi i këtij viti duke u përpjekur të kapërcejnë Detin Mesdhe, përfshirë 291 persona të mbytur në Egje. /tesheshi.com/
