VËZHGIM/ Qytetarët e Maqedonisë, punojnë vetëm sa për të ngrënë – ja ç`tregojnë statistikat

Nga Bekim Laci 

Fuqia blerëse e qytetarit të Maqedonisë është shumë e dobët, gjë që e tregojnë statistikat, sipas së cilave, paga mesatare prej 348 €  dhe shporta e konsumit që është vetëm 200 € e katandisin këtë qytëtar më të varfërin në rajon. Sa për ilustrim, shporta në Serbi arrin 557 €, 908 € në Kroaci, dhe 770 € në Mal të Zi.

Fatkeqsisht, një pjesë e madhe të këtyre të hyrave shkojnë për ushqim dhe sipas statistikave kjo sillet rreth 70%, por varësisht nga situata ajo mund të shkojë dhe mbi 90%.

Në bazë të të dhënave i bie që qytetari i Maqedonisë blerjen e produkteve ushqimore ta ketë prioritet numër një, gjë e cila sipas ekspertit ekonomik Gadaf Rexhepi ka intensifikuar trendin e hapjes së shumë marketeve pasi biznesmenët, siç thotë ai, çdoherë e nuhasin tregun.

Duke analizuar këtë fenomen, për portalin ‘tesheshi.com’, Rexhepi tha se rrogat e ulëta implikojnë strategjine “Çmim më të ulët”, strategji kjo që në shikim të parë duket e mirë por që i ka dhe anët negative: ”Kjo garë në çmime sa më të ulëta po na sjell produkte me cilësi shumë të ulët të cilat mund të jenë shumë të dëmshme për shëndetin e konsumatorëve. Ky trend, po e përsëris, si rezultat i rrogave shumë të ulëta, nuk është vetëm tek supermarketet, por edhe në shumë biznese tjera, sidomos do të kisha veçuar Fast Food-et e ndryshme, restorantet etj”, tha Rexhepi, pohimet e të cilit deri diku i konfirmon  Bujar Murati, pronar i dy marketeve.

Për portalin ‘tesheshi.com’, ai deklaroi se produktet ushqimore janë më të shiturat, mes 60 dhe 70% nga totali, por sa i përket fuqisë blerëse të konsumatorëve thotë se atyre gjithmonë u ofron alternativë:

“Produktet të cilat i ofroj, gjithmonë kanë alternativë çmimore për blerësit me buxhet të ulët familjar, kështu krahas një produkti, në të shumtën e rasteve gjendet i njëjti produkt, por nga prodhues tjetër më të lirë”, tha Murati.

Paralelisht me fenomenin e hapjes së marketeve, po ndodh dhe fenomeni i restoranteve  Fast Food të cilat ofrojnë ushqim të shpejtë e me çmim jashtëzakonisht të lirë.

Vetëm në rrugën e Jahja Pashës në Shkup, janë hapur dhjetra të tilla, ndërsa konkurenca e ka bërë të veten. Secili produkt në këtë rrugë është dyfish më i lirë se në secilën pjesë tjetër të qytetit, ndërsa si pjesë e strategjisë janë dhe aksionet promovuese të cilat për habi zgjasin me muaj të tërë.

Çmimi i ulët i hamburgerit, (dy copë për 1.40 €), por edhe i specialiteteve turke si Lahmagjun, Doner ( dy copë për 1.50 € ), seriozisht ngjallin dilemën se cili mund të jetë përfitimi i prodhuesit në këtë rast.

Sejdi Fazliu na tha se shkojnë në fitim të ulët, gjë të cilën e imponon fuqia e ulët blerëse, porse ata kanë gjetur mënyrën që të dyja palët, si shitësi ashtu edhe konsumatori të mbeten të kënaqur: “Këto produkte të cilat i ofrojmë nëpërmjet aksioneve, për hir të së vërtetës janë një çik më të vogla se sa të zakonshmet, sepse kjo është e vetmja mënyrë që ne të kemi qarkullim, por edhe qytetarët me buxhet të ulët të kenë në mundësi të shijojnë këtë ushqim”, na tha

Sejdi Fazliu, i cili gjatë muajit të Ramazanit ka ndryshuar menynë nga e cila ka larguar hamburgerin dhe specialitetet turke, duke u orientuar në gjellëra nga kuzhina tradicionale, por edhe këto me çmime speciale. /tesheshi.com/