“Dorëzimi i mandatit nga Saimir Tahiri është vazhdim i paktit Rama-Tahiri”, vetëm kështu e sheh kreu demokrat Basha, aktin e beftë të ish-ministrit të Rendit, më të sulmuarin nga opozita sa ishte në detyrë, dhe më pas kauzë opozitare pas ikjes.
Prej ditësh i munguar me deklarime, Basha është rikthyer me rastin “Tahiri”, duke e lexuar si konspiracion atë që ka ndodhur
“Është fakt se dorëheqja nga mandati erdhi pas presionit direkt që iu bë Edi Ramës në Berlin, ku iu tha se është e patolerueshme mbrojtja politike që i bëhet Saimir Tahirit me imunitet parlamentar kundër veprimeve të drejtësisë. Ky është akt hileqar për të mashtruar partnerët se gjoja Saimir Tahiri nuk ka imunitet politik dhe se gjithçka është në dorën e prokurorisë”, u shpreh Basha.
Kreu demokrat shpreh bindjen se Tahiri e mban nën shantazh, ish-shefin e tij Rama.
“Dorëzimi i mandatit të Tahirit nuk e shpëton Edi Ramën. Ai e di se asnjë manovër si kjo me largimin e Tahirit nga Parlamenti nuk i mashtron dot shqiptarët dhe faktorin ndërkombëtar”, theksoi kryedemokrati. /tesheshi.com/
