Nga Zimbabve, një vend ku shumë duhet të punojnë natën, sepse kjo është e vetmja kohë që ka energji elektrike, në Nigeri, ku kolapset e rrjetit të energjisë janë të shpeshta, furnizimi i besueshëm me energji elektrike mbetet një gjë e rrallë në të gjithë kontinentin afrikan.
Mungesa e energjisë elektrike që prek 54 vende afrikane paraqet një pengesë serioze për rritjen ekonomike të kontinentit, paralajmërojnë ekspertët e energjisë, raporton AP.
Vitet e fundit, prodhimi i energjisë elektrike në Afrikën e Jugut është bërë aq i pamjaftueshëm sa që edhe ekonomia më e zhvilluar në kontinent duhet të përballet me ndërprerjet ditore prej tetë deri në dhjetë orë.
Kërkohet investim i madh
Sipas të dhënave nga Agjencia Ndërkombëtare e Energjisë për vitin 2021, 43 për qind e afrikanëve, rreth 600 milionë njerëz, nuk kishin akses në energji elektrike, duke përfshirë 590 milionë në Afrikën Sub-Sahariane.
Sipas vlerësimeve të Bankës Botërore, nevojiten investime prej afro 20 miliardë dollarë në vit për të siguruar elektrifikim uniform në të gjithë Afrikën Sub-Sahariane.
Nga kjo, është e nevojshme të ndahen pothuajse 10 miliardë dollarë në vit për sjelljen e energjisë elektrike dhe mirëmbajtjen e rrjetit në Afrikën Perëndimore dhe Qendrore. /tesheshi.com/
