Ai mbeti i gjallë nga sulmi i vitit 2015 dhe ishte një nga të parët që u plagos nga të shtënat me armë të vëllezërve Kouassi që sulmuan zyrat e revistës Charlie Hebdo.
Simon Fiesi vdiq të enjten në moshën 40-vjeçare, sipas të afërmve të tij, shkruan gazeta franceze Le Figaro.
I martuar me një grua australiane dhe baba i një fëmije, ish-drejtuesi i internetit i revistës satirike ishte anëtari i parë i ekipit redaktues të Charlie Hebdo që u sulmua nga vëllezërit Kouassi më 7 janar 2015.
Ai mbijetoi por mbeti i gjymtuar për gjithë jetën. Një plumb kallashnikovi e goditi në shtyllën kurrizore, duke i ndryshuar përgjithmonë jetën.
Pas nëntë vitesh, thonë të afërmit e tij, trupi i Fiesit u gjet në një dhomë hoteli.
Nuk janë zbardhur ende rrethanat e vdekjes së tij dhe prokuroria e Parisit ka konfirmuar për gazetën Le Figaro se ka nisur hetimi për të identifikuar shkaqet e vdekjes pas zbulimit të trupit të tij.
Megjithëse është kryer një autopsi, gjetjet e saj nuk ishin në gjendje të përcaktonin shkakun e vdekjes së Simon Fiessy. “Hetimet janë në vijim”, shtoi prokuroria.
Sipas një burimi të afërt me rastin, trupi i tij u gjet të enjten në një dhomë hoteli në Paris.
“Ndryshe nga sa u njoftua nga disa media, në këtë fazë të hetimeve nuk ka asnjë provë në favor të një vetëvrasjeje, për këtë arsye nuk dihen ende shkaqet e vdekjes së tij”, nënvizoi prokurori Datali Senik, duke i bërë thirrje “të gjithëve të kenë shumë kujdes përpara rezultatit përfundimtar të hetimit”.
Simon Fiessy iu bashkua ekipit editorial të revistës famëkeqe satirike Charlie Hebdo në vitin 2012.
Kur vëllezërit Kouassi sulmuan zyrat e revistës Charlie Hebdo, Fiesi tha se mbylli sytë dhe ra në tokë, duke besuar se ky veprim refleks “mund t’i ketë shpëtuar jetën”.
Pas plagosjes së tij më 7 janar, Fiesi u shtrua në spital dhe u vendos në një koma të induktuar, duke u zgjuar më 11 janar.
Shtrimi i tij i plotë zgjati gjithsej tetë muaj, më pas për disa vite ai vazhdoi të shkonte çdo ditë në spital. Më pas, vuajti psikologjikisht. /tesheshi.com/
