17 ditë pas vdekjes së ish-aktivistit të lëvizjes Vetëvendosje, Astrit Dehari shkarkohen nga detyra 4 punonjës të burgut të Prizrenit. Më 5 nëntor 26-vjeçari humbi jetën në një prej dhomave të paraburgimit. Në një njoftim për mediat, ministria e Drejtësisë sqaroi se është shkarkuar drejtori i qendrës së Paraburgimit, bashkë me 3 gardianë.
“Inspektorati i kësaj ministrie gjatë inspektimit, nuk ka gjetur asnjë veprim të institucionit, i cili në çfarëdo mënyre do të ishte nxitës apo shkaktar i vdekjes së Deharit. Edhe pse janë identifikuar disa neglizhenca proçeduriale. Si pasojë e këtyre neglizhencave janë iniciuar proçedurat disiplinore ndaj një zyrtari korrektues, dy mbikëqyrësve si dhe ushtruesit të detyrës së drejtorit, të cilëve po ashtu u është shqiptuar edhe masa e pezullimit, si masë paraprake”, thuhet në komunikatë.
Por, ministria e Drejtësisë nuk tregon se për çfarë neglizhecash bëhet fjalë, por në të njëjtën kohë konstaton se nuk ka pasur ndonjë faktor nxitës, apo shkaktarë të vdekjes së Astrit. Me fjalë të tjera, nënkupton se Astriti është vetëvrarë.
Familja Deharit, përmes një deklarate ka thënë se nuk e pranojnë hetimin ndërkombëtar pa u shkarkuar dy ministrat, Dhurata Hoxha ministre e Drejtësisë dhe Skënder Hyseni, ministri i Punëve të Brendshme. Familja e të ndjerit thotë se kërkesa e ministres Hoxha për një hetim të pavarur të vdekjes së djalit të tyre është pranim i saj për papërgjegjësinë dhe për paaftësinë e kësaj qeverie dhe të institucioneve shtetërore për ta zbardhur rastin e zbuluar shkaktarin e vdekjes.
“Pa dorëheqje të këtyre dy ministrave dhe pa ndërprerjen e hetimeve aktuale, ne si familje Dehari nuk pajtohemi për hetime ndërkombëtare, përkundër vlerësimit të lartë që kemi dhe reputacionit të lartë që ka Scotland Yard”, janë shprehur familjarët./tesheshi.com
