Një i nxehtë i jashtëzakonshëm e ka mbërthyer prej ditësh Indinë, e për pasojë kanë humbur jetën më së paku 800 njerëz. Temperaturat në Nju-Delhi kanë arritur në 50 gradë, dhe Departamenti Meteorologjik i Indisë njofton se e njëjta situatë do të jetë dhe në ditët në vazhdim.
Spitalet janë në gatishmëri për të pritur të goditurit nga i nxehti, ndërsa qeveria ka nisur një fushatë, duke u kërkuar njerëzve të veshin rroba të lehta e të mos dalin nga shtëpitë prej orës nëntë të mëngjesit gjer pasdite nëse nuk është e nevojshme. Mijëra “kampe uji” janë ngritur në tërë vendin për t’u ofruar ujë të pijshëm banorëve.
Shteti më i goditur nga vala e të nxehtit është Andra Pradeshi, në jug të Indisë, ku vetëm gjatë javës së fundit kanë vdekur 551 persona, e rrugët e Hajdarabadit janë të shkretuara.
Ekspertët ua vënë fajin rreshjeve jostinore nga marsi gjer në javën e dytë të majit për numrin e lartë të vdekjeve. Ata thonë se reshjet bënë që temperaturat të ngriheshin menjëherë, e shumë prej njerëzve nuk i përballuan ato. Sipas tyre, ka një sërë shkaqesh për viktimat e shumta, ku i pari mes tyre është ai çka quhet aklimatizimi klimatik. “Këtë vit temperatura ndryshoi papritur. Kjo e çrregullon mekanizmin mbrojtës të trupit. Të moshuarit, të përfshirët në punë fizike, fëmijët dhe gratë shtatzëna e pësojnë lehtësisht nga goditja e diellit nëse ka aklimatizim të dobët klimatik,” thotë njëri prej tyre.
Qindra njerëz, zakonisht të shtresës së varfër, vdesin çdo vit në stinën e verës në Indi, dhe mijëra të tjerë vuajnë mungesën e energjisë elektrike për shkak të mbingarkesës së rrjetit. /tesheshi.com/
