Rrëzohet një mjet luftarak fluturues që drejtohet me telekomandë që shkeli hapësirën turke ndërkohë që mediat botërore theksojnë se është avion rus. Porautoritetet ruse e kanë mohuar këtë fakt.
“Konstatuam një mjet ajror me kombësi të paidentifikuar brenda hapësirës ajrore të vendit tonë në kufirin sirian dhe, duke qenë se nuk u largua edhe pse u paralajmërua tri herë, ai u godit dhe rrëzua nga avionët tanë patrullues të kufirit në kuadër të rregullave të angazhimit. Forcat e Armatosura të Turqisë kryejnë me vendosmëri dhe në bazë të rregullave të angazhimit çdo detyrë, që u jepet”, thuhet në komunikatën e publikuar me këtë rast nga Shtabi i Përgjithshëm i ushtrisë turke.
Sakaq, agjencia ruse e lajmeve, “Itar-Tass”, njoftoi sot se të gjithë avionët ushtarakë rusë me mision në Siri janë kthyer të sigurt në baza.
Bazuar në burime të Ministrisë ruse të Mbrojtjes dhe asaj të Punëve të Jashtme, “Itar-Tass” thekson gjithashtu se edhe operacionet e mjeteve ajrore të telekomanduara vijojnë sipas planeve.
Një delegacion i Forcave Ajrore të Federatës së Rusisë realizoi të enjten një vizitë në Shtabin e Përgjithshëm të Forcave të Armatosura të Turqisë, duke ndarë informacione në lidhje me operacionet ruse në Siri.
I kryesuar nga zv/komandanti i Forcave Ajrore të Rusisë, Gjeneralmajor Sergey Dronov, delegacioni moskovit bëri sqarime rreth arsyeve të disa shkeljeve të hapësirës ajrore turke nga avionët luftarakë rusë më 3-4 tetor, si dhe shkëmbeu mendime me autoritetet ushtarake turke për masat në lidhje me parandalimin e përsëritjes së tyre. /tesheshi.com/
