Forcat e ushtrisë irakiane bashkë me pjestarët e milicisë Hashed al Shabi kanë bllokuar të gjitha daljet nga ky qytet
Në një deklaratë nga Ministria e Mbrojtjes së Irakut thuhet se ushtria së bashku me pjestarët e milicisë Hashed al Shabi po përparojnë drejt Anbarit dhe se të gjitha rrugët e Ramadit janë të bllokuara.
“Në këtë mënyrë, është parandaluar ikja e militantëve të ISIS-it (DEASH)”, thuhet në deklaratë.
Krahas kësaj, ushtria irakiane sot në mëngjes ka kryer një aksion të suksesshëm kundër ISIS-it (DEASH-it) pranë qytetit Tikritit duke shkatërruar disa automjete të kësaj organizate terroriste. Ushtria gjithashtu ka thyre rezistencën e ISIS-it (DEASH-it) në rrethimin e digës Nazim et-Taksim në perëndim të Bagdadit, i cili furnizon me ujë rajonin ndërmjet krahinave Anbar dhe Salahaddin.
Autoritetet thanë se në zonën përreth digës janë vrarë 18 terroristë, janë shkatërruar pesë automjete dhe u çaktivizuan rreth 80 mina. Ndërkohë ushtria ka konfiskuar një sasi të madhe municioni.
Qyteti i Ramadit në provincën më të madhe irakiane të Anbar për rreth dy javë ndodhet nën pushtimin e ISIL-it (DEASH-it). Për të rimarrë kontrollin e qytetin, ushtria irakiane dhe milicia Hashed al Shabi kanë nisur një operacion të gjerë ushtarak më 26 maj të këtij viti.
