Një gjashtëmbëdhjetëvjeçar palestinez humbi jetën mbrëmë në rrethinat e Jerusalemit Lindor pasi u qëllua për vdekje nga ushtarët izraelitë.
Incidenti ndodhi gjatë mesnatës pranë një pike kontrolli, dhe policia izraelite pretendon se djaloshi mbante dy thika dhe u përpoq t’i sulmonte ushtarët. Zëdhënësja e policisë, Luba Samri, tha se u qëllua fillimisht në ajër për ta paralajmëruar të riun. Më pas, me fjalët e saj, “trupat e qëlluan të dyshuarin duke e neutralizuar,” pasi ai nuk ua vuri veshin paralajmërimeve.
Në anën tjetër, të afërmit e viktimës deklarojnë se ai u vra pa asnjë arsye. Sipas tyre, ushtarët qëlluan mbi të pa u sulmuar.
Ndërkohë, agjencia palestineze e lajmeve WAFA raporton se ushtarët e ndaluan të riun që po ecte bashkë me një femër në moshë të re nga familja e tij dhe nisën t’i provokonin, duke vijuar më tutje me fjalë vulgare. Ngjarja bëri që i riu të përfshihej në një grindje me ushtarët, të cilët më pas e ekzekutuan atë.
Ushtria izraelite nuk pranoi t’ia dorëzonte trupin ambulancës së Gjysmëhënës së Kuqe që mbërriti në vendngjarje, dhe e dërgoi atë në një vend të panjohur.
Tensioni në këtë hapësirë vijon të jetë i pranishëm, teksa dje tanket izraelite kryen sulme në Gaza në përgjigje të një rakete të hedhur nga ky territor gjatë kremtimeve për Ditën e Pavarësisë. /tesheshi.com/
