Zyrtarë të lartë të vendit amerikanolatin kanë deklaruar se vendi do të presë një grup tjetër sirianësh nga fundi i vitit, si shprehje e angazhimit modest për të ndihmuar në lehtësimin e një krize humanitare.
Uruguaji mirëpriti 42 refugjatë sirianë në tetorin e vitit të shkuar, ndërsa nën qeverisjen e presidentit Jose Mujica ishte rënë dakort fillimisht që numri i tyre i përgjithshëm të ishte 120.
Në deklarimin e tij, ministri i Jashtëm uruguajan, Rodolfo Nin Novoa, tha mes të tjerash se, “Qeveria kombëtare do t’i respektojë angazhimet. E dimë se kjo kushton para. Por unë i bëj apel ndjeshmërisë dhe solidaritetit të uruguajanëve për të kuptuar dramën e përjetuar nga këto familje: një xhehennem i vërtetë në tokë.”
Ai bëri të ditur se një grup prej shtatë familjesh siriane do të arrijnë në Uruguaj në fund të këtij viti. Njëkohësisht, ministri i hodhi poshtë zërat kritikë se vendi nuk duhet të presë më refugjatë.
Sirianët po zhvendosen për në Uruguaj nga kampet e refugjatëve në Liban. Risistemimi i tyre u planifikua vitin e shkuar, por plani u vu në dyshim për shkak të kufizimeve buxhetore.
Ish-presidenti Jose Mujica pati luajtur një rol kyç në nisjen e programit për integrimin e sirianëve në vend, por me zgjedhjen e presidentit të ri në mars, Tabare Vazquez-it, u ngritën pikëpyetje mbi shpenzimet e programit.
Uruguaji është një vend i vogël në Amerikën Latine, me 3.3 milionë banorë sipas vlerësimeve të vitit 2013, por spikat si vendi i parë amerikanolatin që ofron një program risistemimi për refugjatët sirianë. Numri i refugjatëve të risistemuar është sigurisht modest, por iniciativa e Uruguajit shpresohet të jetë një shembull për vendet e tjera. /tesheshi.com/
