Zëvendëskryeministri turk, Bulent Arënç, theksoi në një konferencë shtypi të mbajtur të hënën se Turqia ka pritur gjatë ditëve të fundit mbi 16.000-17.000 refugjatë sirianë. Ai u shpreh se ndonëse në vendin e tij ka tanimë 1.6 milionë të tillë, e Turqia nuk mund t’i mbyllë kufijtë për ata që kërkojnë ndihmë, është e pamundur të vazhdohet t’u bëhet vend mijëra të tjerëve, duke u kërkuar vendeve perëndimore të bëjnë më shumë për ta ndarë këtë barrë mes tyre.
Vërshimi i fundit i refugjatëve është provokuar nga intensifikimi i luftimeve midis ISIS-it dhe YPG-së, Njësive të Mbrojtjes Popullore, në provincën e Tel Abjadit, si dhe prej goditjeve ajrore të objektivave të ISIS-it në këtë rajon.
Turqia hapi edhe një herë të hënën kufijtë për sirianët që u ikin përplasjeve në Tel Abjad. Luftimet mes milicisë së YPG-së dhe militantëve të ISIS-it i kanë shtrënguar mbi 19.445 njerëz të kalojnë në Turqi që nga 3 qershori. Vetëm këtë të dielë janë pranuar 2.800 refugjatë sirianë, numrit të të cilëve i janë shtuar 1.600 të tjerë të pritur të hënën.
Numan Kurtulmush, po ashtu zëvendëskryeministër në qeverinë turke, e përshkroi situatën në Tel Abjad si një krizë humanitare, të ngjashme me atë në Kobani dhe në rajone të tjera të Sirisë. Ai paralajmëroi se Turqia duhet të përgatitet të presë më së paku 100.000 refugjatë sirianë nga Tel Abjadi pas luftimeve mes luftëtarëve kurdë dhe atyre të ISIS-it.
Rreth 2 milionë sirianë kanë gjetur strehë në Turqi që prej fillimit të konfliktit në Siri në vitin 2011, ndërsa vërshimi i tyre nuk ka të ndalur.
