Presidenti Thaçi ka mbrojtur tezën e “korrigjimit të kufijve”, për herë të parë duke patur homologun Vuçiç në krah, e për më tepër duke e shpalosur këtë vizion të tij delikat, në zemër të Europës. Në konferencë të përbashkët në Forumin Europian në Alpbach të Austrisë, Thaçi tha se askush nuk duhet të frikësohet nëse marrëveshja finale mes Kosovës e Serbinë përfshin dhe ndryshim kufijsh.
“Dua të risigurojë fqinjët tanë që të mos kenë frikë nga një marrëveshje mes Kosovës dhe Serbisë. Edhe nëse një marrëveshje e tillë implikon një korrigjim kufijsh. Kosova dhe Serbia nuk do të jenë të parat as të fundit që do të bëjnë korrigjim kufijsh për të arritur paqe”, deklaroi presidenti kosovar.
Thaçi vijoi më tej duke thënë se “mosarritja e kësaj marrëveshje paraqet rreziqe të mëdha, por atë mirat e arritjes janë shumë më të mëdha. Prandaj kemi provuar shumë të gjejmë zgjidhje drejt një marrëveshje të pajtimit të përbashkët. Jemi të vetëdijshëm se paqja duhet të ruhet në Ballkan me çdo kusht”.
Nga ana tjetër, Vuçiç iu përcolli një mesazh ndërkombëtarëve, me nëntekstin e mbështetjes ndaj tij dhe Thaçit, në idenë e rindarjes së kufijve.
“Bëhet fjalë për serbët dhe shqiptarët, ne duhet të jetojmë së bashku në të ardhmen. Këto janë kombet më të mëdha në Ballkanin Perëndimor dhe kështu do të mbetet edhe në 100 vitet e ardhshme. Kush do ta zgjidhë këtë problem nëse nuk jemi në gjendje ta bëjmë këtë”, tha Vuçiç. /tesheshi.com/
