Shtetet e Bashkuara dhe Izraeli kanë kontaktuar zyrtarë në tre vende të Afrikës Lindore për të diskutuar mundësinë e përdorimit të territoreve të tyre për të zhvendosur palestinezët nga Gaza, raportoi sot Associated Press, duke cituar zyrtarë amerikanë dhe izraelitë.
Zyrtarët nga Sudani, Somalia dhe rajoni i shkëputur i Somaliland kanë qenë në kontakt në lidhje me propozimin, raportoi AP, duke cituar zyrtarë amerikanë dhe izraelitë si burime.
Megjithatë, zyrtarët sudanezë thanë se e refuzuan propozimin e SHBA-së, ndërsa ata somalezë dhe somalilandezë thanë se nuk ishin në dijeni të ndonjë kontakti, raportoi AP.
Në fillim të këtij muaji, liderët arabë miratuan një plan egjiptian prej 53 miliardë dollarësh për të rindërtuar Gazën, i cili nuk parashikon zhvendosjen e palestinezëve nga enklava, në kontrast me vizionin e presidentit amerikan Donald Trump për një “rivierë të Lindjes së Mesme”.
Ndërkohë, Gaza ishte dhe vijon të jetë një leksion i qartë se ajo çfarë synon Izraeli nuk mund të ndodhë. Përfshirë dhe atë që synon Trump, ndonëse ky i fundit, në paparaashikueshmërinë e vet do deklaronte se nuk do ketë spastrim të palestinezëve nga Gaza.
Kujtojmë se zhvendosjet e deritanishme të palestinezëve, ç’prej kur nisi pushtimi izraelit dekada më parë, janë në kampe refugjatësh rreth dhe afër tokës së tyre e jo gjetkë larg asaj toke. Që do të thotë se ata as nuk janë shkulur e as do shkulen prej aty, paçka projekteve si ky i fundit. /tesheshi.com/
