Gazsjellësi Trans-Adriatik, me origjinë nga Azerbajxhani, bën të ditur se ecuria e tij në Shqipëri po ecën sipas parashikimeve.
Në një njoftim për shtyp, TAP thekson se deri më tani janë kryer rreth 64 për qind të 100 kilometrave rrugë e 44 urave që duhen kryer në total.
Mësohet se ka përfunduar ndërtimi i 27 urave dhe i dy akseve rrugore, që gjenden kryesisht në rajonin e Korçës, Çorovodës dhe Fierit. Këto punime prekin në tërësi 1,300 parcela toke, ndërsa tubat do të shtrihen në rreth 7,500 parcela. Sipas të dhënave më të fundit, nga i gjithë procesi kadastral do të përfitojnë 25,000 persona. Përmirësimi i tij është ndjekur sipas standardeve të BERZH-it.
Rruga që përshkon TAP-i mund të lehtësojë furnizimin me gaz të disa vendeve të Europës Juglindore, përfshirë Bullgarinë, Shqipërinë, Bosnjën dhe Hercegovinën, Malin e Zi, Kroacinë dhe të tjera.
Dalja në tokë e TAP-it në Itali, ofron mundësi të shumta për transportimin e mëtejshëm të gazit natyror të Kaspikut në disa nga tregjet më të mëdha europiane, si Gjermania, Franca, Britania e Madhe, Zvicra dhe Austria.
TAP-i do të nxisë zhvillimin ekonomik dhe krijimin e vendeve të punës përgjatë rrugës së tubacionit; ai do të jetë një burim i madh i Investimeve të Huaja Direkte. Pas shitjeve të para të gazit në Gjeorgji dhe Turqi, të synuara për fundvitin 2018, prurjet e para në Europë do të fillojnë përafërsisht në fillimvitin 2020. /tesheshi.com/
