Zhvillohen sot në Shqipëri zgjedhjet vendore për kryetarët dhe këshillat e 61 njësive administrative apo bashkitë sipas ndarjes së re territorial në vend.
Bëhet fjalë për 61 kryetarë bashkish dhe 1595 këshilltarë që do të zgjidhen nga llogaritja e votave të marra nga partitë politike të regjistruara në zgjedhje.
Qytetarët me të drejtë vote do të hedhin dy letra në dy kuti votimi, në njërën do të votojnë për kreun e bashkisë dhe në tjetrën do të qarkojnë subjektin politik që dëshirojnë për të zgjedhur këshillin e ri të bashkisë.
Bashkitë që do të konstituohen nga vota e sotme janë: Belsh, Berat, Bulqizë, Cërrik, Delvinë, Devoll, Dibër, Divjakë, Dropull, Durrës, Elbasan, Fier, Finiq, Fushë-Arrëz, Gjirokastër, Gramsh, Has, Himarë, Kamëz, Kavajë, Këlcyrë, Klos, Kolonjë, Konispol, Korçë, Krujë, Kuçovë, Kukës, Kurbin, Lezhë, Libohovë, Librazhd, Lushnjë, Malësi e Madhe, Maliq, Mallakastër, Mat, Memaliaj, Mirditë, Patos, Peqin, Përmet, Pogradec, Poliçan, Prrenjas, Pukë, Pustec, Roskovec, Rrogozhinë, Sarandë, Selenicë, Shijak, Shkodër, Skrapar, Tepelenë, Tiranë, Tropojë, Ura Vajgurore, Vau-Dejës, Vlorë, Vorë.
Numri i përgjithshëm i zgjedhësve të regjistruar është : 3.382.295, por në fakt kjo është një shifër jo funksionale. Në zgjedhjet vendore të vitit 2011 kanë votuar gjithsej 1.571.096 zgjedhës, pra më pak se gjysma e qytetarëve që figurojnë në lista.
Administrimi i votës
Administrata Zgjedhore në zgjedhjet e sotme është e ngritur në rang Republike dhe me disa shkallë. Kështu ka komisionerë të Qendrave të Votimit(QV), Komisionerë të Zonave të Administrimit të Votës, dhe Komisioni Qendror i Zgjedhjeve. Në fund organi që vepron si Gjykatë Zgjedhore është Kolegji Zgjedhor i ngritur me dekret të posaçëm të Presidentit ku anëtarët e tij janë zgjedhur me short para dy vjetësh.
Shqipëria është e ndarë në 90 Zona të Administrimit Zgjedhore, të cilat funksionojnë në një ndarje të përzier: bashkitë e vogla kanë vetëm një ZAZ kurse bashkitë e mëdha kanë më shumë sipas numrit të popullsisë. ZAZ është njësia bazë dhe më e rëndësishme vendimarrëse e administrimit të votës, pasi kontrollojnë procesin nëpër QV-të që kanë në kompetencë dhe pranë tyre do të ngrihen me vendim të ZAZ 90 Grupet e Numërimit të Votës që përbëjnë dhe organizmin më me peshë dhe më të brishtin, pasi nga duart e numëruesve do të kalojnë dhe llogariten të gjitha fletët e votimit ku shqiptarët kanë dhënë vullnetin e tyre për administratorët e rinj.
Sipas traditës politike në vend, anëtar të grupeve të numërimit zgjidhen jo më të zgjuarit në llogaritje, por më të fortët dhe muskulozët, me sebepin për të ruajtur votën.
GNV-të përbëhen nga 4 anëtarë; një anëtar i përket partisë më të madhe të shumicës, një anëtar partisë më të madhe të opozitës, një anëtar nga partia e dytë e shumicës dhe anëtari i katërt nga partia e dytë e pakicës. Anëtarët e GNV pasi numërojnë votat në kutitë, hartojnë procesverbal për çdo kuti dhe e dërgojnë në ZAZ, e cila bën edhe procesverbalin final të të gjitha votave të numëruara.
Certifikimi i rezultatit final është një histori më vete. Bashkitë e vogla të cilat kanë nga 1 ZAZ do ta bëjnë vetë edhe shpalljen e fituesit për kreun e bashkisë dhe llogaritjen e votave për këshilltarë. Ndërsa qytetet e mëdha që kanë më shumë se 1 ZAZ, certifikimin e rezultatit do ta bëjë Komisioni Qendror i Zgjedhjeve, i cili ka 7 anëtarë, 3 të zgjedhur nga përfaqësuesit e mazhorancës dhe katër të zgjedhur nga përfaqësuesit e opozitës. Ky konfigurim ishte në fuqi kur PD ndodhej në qeverisje dhe kësaj herë nuk u ndryshua.
/tesheshi.com/
