Pothuajse gjysma e qytetarëve evropianë kanë frikë se inteligjenca artificiale do të shuajë vendet e punës, sipas një sondazhi të kompanisë së sigurimeve Allianz, i cili u krye në gjashtë vende evropiane.
Pak më pak se gjysma e të anketuarve, 46 për qind e tyre, presin që inteligjenca artificiale të zvogëlojë numrin e vendeve të punës, sipas një sondazhi të Allianz Research, raportojnë agjencitë.
Vetëm një e treta e tyre besojnë se teknologjia e re mund të hapë të reja.
Sondazhi u krye me pothuajse 6300 qytetarë të Gjermanisë, Francës, Spanjës, Italisë, Polonisë dhe Austrisë.
Gjysma e të anketuarve besojnë se inteligjenca artificiale thellon hendekun e aftësive dhe pabarazitë, dhe rreth një e pesta e tyre janë optimistë në vlerësimin e përfitimeve të saj të mundshme.
“Qytetarët në shumë vende evropiane janë të alarmuar nga ndryshimi i shpejtë dhe për këtë arsye janë skeptikë ndaj inteligjencës artificiale”, tha studiuesi i Allianz, Arne Holzhausen.
Përfitimi ekonomik
“Çelësi është që (kompanitë) të përdorin mjetet e AI për të plotësuar dhe rritur aftësitë e punëtorëve, jo t’i përdorin ato si zëvendësim (për njerëzit),” tha Holzhausen.
Teknologjia, në fakt, u zhvillua në kohën e duhur, duke pasur parasysh sfidat demografike dhe mungesën e punëtorëve të kualifikuar në shumë vende dhe në shumë sektorë, thotë Holzhausen.
AI mund të ndihmojë në zgjidhjen e këtyre problemeve duke përmirësuar produktivitetin dhe duke automatizuar detyrat rutinë, shton ai. /tesheshi.com/
