Qeveria e re e Kosovës duket se do të varet nga mbi 15 mijë votat e diasporës që do të numërohen në fund.
Siç po shihet, koalicioni që kandidon Ramush Haradinaj si kryeministër nuk i ka votat për të formuar qeverinë dhe një marrëveshje në këto ditë e Albin Kurtit me LDK-në dhe partitë e pakicave, mund ta kthejë ish-liderin e Vetëvendosjes në “Zoran Zaevin” e Kosovës, që sipas këtij modeli të arrijë të formojë qeverinë e re.
Nga konfigurimi i deritanishëm, koalicioni që mori shumicën relative të votave, PAN, pra PDK-AAK-Nisma i është afruar kuotës së 220 mijë votave dhe gjasat janë të arrrijnë numrin e 40 deputetëve.
Por kjo është shifër totalisht e pamjaftueshme për të formuar qeverinë e re, edhe nëse llogariten 20 deputetët e pakicave, ku Lista Srbska, do të ketë në dorë gjithçka.
Lëvizja Vetëvendosje i afrohet numrit të mbi 32 deputetëve dhe LDK-ka rreth 24-25 deputetë.
Votat e diasporës kanë rëndësi të madhe tani që janë numëruar rreth 91% e votave brenda Kosovës, pasi ata kanë gjasa që të japin një konfigurim të ndryshëm, ku perceptohet nga sondazhet se shumica e tyre shkon drejt Vetëvendosjes.
Nëse ndodh kjo, pra që shumicën e votave të diasporës ta marrë Albin Kurti, atëherë koalicioni Haradinaj, Veseli e Limaj nuk do të arrijnë numrin “40 deputetë” dhe mazhoranca qeverisëse nuk sigurohet. Afrohet kështu mundësia e artë për Albin Kurtin që nëse dështon Haradinaj të formojë qeverinë, t’i kërkohet presidentit Hashim Thaçi të që krijojë ekzekutivin e ri.
Nëse e merr Albin Kurti, ky i fundit mund t’i kërkojë LDK-së që të bashkëpunojnë për qeverinë e re dhe kështu arrihen lehtësisht numrat dhe mund të kemi një pushtet Vetëvendosje-LDK.
Këto dy forca kanë bashkëpunuar pak së bashku pas zgjedhjeve të 2014-s, atëherë kur u bënë bashkë kundër Hashim Thaçit por që më pas Mustafa shkoi drejt koalicionit të madh me LDK-në.
Veton Surroi, publicisti i njohur ka bërë thirrje për një koalicion kundër “Klanit Pronto” pra për një bashkim Vetëvendosje-LDK.
“Ky është përvjetori më i rëndësishëm i çlirimit deri tani. Dje u manifestua vota evropiane e qytetarëve të Kosovës. Shumica kritike e qytetarëve të Kosovës, të prirë nga fryma e parimësisë dhe vendosmërisë së Vetëvendosjes, u deklaruan dje për çlirimin e vendit nga kapja e Klanit Pronto. Mbi gjysma e vendeve të Parlamentit të Kosovës do të mbushen me deputetët e një partie socialdemokrate evropiane dhe të një partie a koalicioni konservator (popullor) evropian. Qeverisja evropiane mund të ndërtohet që nga këto zgjedhje, me synim të shtetit të së drejtës , atij social dhe zhvillimor”, shkruan Surroi në postimin e tij.
Këtë tezë mbështet edhe Shpend Ahmeti, kryetari i Komunës së Prishtinës. Por gjasa ka që gjërat të lëvizin edhe brenda koalicionit PAN.
Nëse kuptohet që koalicioni nuk arrin shumicën për qeverinë e re apo numrin e duhur, të paktën mbi 45 deputetë, atëherë Fatmir Limaj ka gjasa t’i rikthehet bashkëpunimit me Vetëvendsjen dhe të japë deputetët e vet për një qeverisje mes Kurtit, Limajt dhe Isa Mustafës, duke pasur në grup edhe Behgjet Pacollin.
Skenari i aleancës së Haradinajt me deputetë të veçantë të Vetëvendosjes dhe LDK-së bie, pasi çdo lëvizje do të digjej që në fillim me kompaktësinë që ka Vetëvendosje; ndërkohë që LDK duket se e ka bërë të qartë se do të nisë një udhëtim opozitar nëse mbyllen lojrat nga “Krerët e Luftës”.
Megjithatë nuk është kaq e thjeshtë. Manovra e Kadri Veselit për t’u larguar nga qeveria me LDK-në dhe për të shkuar në zgjedhje me një aleancë me Limajn dhe Haradinajt doli e pavlerë, pasi PDK mori shumë më pak vota se Hashim Thaçi në vitin 2014, vota që dukshëm i ka marrë Vetëvendosje.
Dhe leximi politik i 11 qershorit të Kosovës duket i qartë. Elektorati nuk i ka dhënë Ramush Haradinajt shumicën e qartë për të qeverisur dhe nguti për zgjedhje të parakohshme qëlloi e pavlerë.
Në leximin e rezultatit duhet marrë parasysh edhe votat e mëdha të pavlefshme, 50 mijë të tilla, të cilat sipas kryetarit të partisë “Fjala”, kanë qenë vota për këtë forcë politike.
Kur këto 50 mijë vota, një numër shumë i madh që nxjerr më shumë se 5 deputetë në Kuvend të shqyrtohen në KQZ, ka gjasa që gjithçka të riformulohet dhe mund të përmbysen shifrat aktuale.
Por të gjithë skenarët që diskutohen kanë një rezultante: Ramush Haradinaj dhe koalicioni PAN nuk ka marrë votat e plota për të qeverisur vendin. /tesheshi.com/
