Mjaft femra dëshirojnë të ndryshojnë pamjen e tyre dhe shpesh, kur vjen momenti i lyerjes së flokëve, ato janë në mëdyshje nëse duhet të përdorin kënanë apo bojëra të markave të ndryshme. Të shumta janë përfitimet e kësaj lyerje natyrale, e cila është shumë e mirë për të forcuar majat dhe për t’i bërë flokët që të shkëlqejnë më shumë. Ndoshta kjo është arsyeja që mjaft femra në Afrikë dhe në Indi e përdorin këtë metodë prej shekujsh, edhe për të lyer duart, në rituale të ndryshme.
Është një pluhur që ka veti të shumta, kënaja ndihmon në ngjyrosjen e flokëve me nuanca të kuqe. Sot është mjaft e thjeshtë të gjesh këtë produkt në treg me ngjyra dhe nuanca të ndryshme, nga e verdha e artë, e kuqja e flaktë apo e zeza, të gjitha natyrale në masën 100%.
Kënaja, flokët dhe përfitimet nga ajo
Pasi kënaja aplikohet në flokë i bën ata të jenë më të butë, më të ndritshëm dhe më pak të shkatërruar. Ajo ka aftësi të luftojë zbokthin dhe këshillohet veçanërisht për flokët që janë të brishtë. Në të nuk ka agjentë kimikë, të cilat mund të jenë tepër agresiv për majat delikate.
Të lyesh flokët me këna kërkon durim të madh dhe kjo gjë mund të realizohet vetëm nëse ke kohë të lirë. Është një lyerje natyrale por që lë njolla, ndaj këshillohet që gjatë lyerjes së flokëve të përdoren bluza apo veshje, të cilat janë të vjetra dhe që nuk do t’i vishni më. Në shpinë mund të vendosni një peshqir dhe në duar doreza plastike. Mos harroni të aplikoni një bazë kremi në ballë dhe në veshë, në mënyrë që ët formohet një barrierë kundër njollave.
Kënaja për flokët
Përgatitja e bojës me këna është shumë e thjeshtë. Vendosni ujin të ziejë dhe më pas përziejeni në pluhurin e kënasë. Mund të shtoni edhe pak kos natyral për ta bërë më të plotë, të trashë dhe të butë bojën, e cila duhet të shpërndahet në mënyrë homogjene në flokë të larë dhe të lagur. Më pas mbulojini me një qese transparente dhe lëreni bojën e përftuar të veprojë në flokë për një orë përpara se t’i shpërlani./tesheshi.com/
