Parë hollë-hollë, në terma politikë, rasti i Kelit, siç i thërrasin ndryshe Kelmend Balilin në rrethin shoqëror, përbën “bllokun” nr. 2 të Ilir Metës, pas atij të mesjanarit 2011, që çoi më pas dhe në tragjedinë e datës 21 me katër të vrarë në bulevard.
Por ja që PD-ja po e kursen sërish në këto orë deliri politik të saj, duke e kompromentuar akoma më rëndë moralin e saj politik, gatuar me një skuthllëk të paparë. Sepse, siç shihet, të gjitha bateritë i ka lëshuar ndaj Saimir Tahirit, dhe nuk lëshon qoftë dhe një plumb të vetëm, qoftë dhe stërvitor, ndaj kreut të LSI-së. Sepse, para se fenomeni “Kel Balili” të jetë një njollë mazhorance, ajo është më së pari njollë e LSI-së.
Në Sarandë dihet kalimi i Balilajve nga PD-ja në LSI, sapo Meta u rikonfirmua si faktor i fuqishëm politik pas kthimit në aleancë me PS-në, si një forcë vendimtare për ta fituar dhe për ta mbajtur pushtetin. Kështu, i vëllai i Kelit, Bako Balili, merr drejtimin e degës së LSI-në Delvinë duke vënë kontrollin njëherësh dhe mbi atë të Sarandës.
Për tre vjet me radhë, ai dhe Koço Kokëdhima kanë qenë e janë dyshja e “politikave të kuadrit”, punësimeve pra, në pellgun Sarandë – Delvinë, pa izmën e të cilëve nuk ndodh asnjë lëvizje.
Po ashtu, Kelmend Balili është në detyrën e kreu të Transportit Rrugor, dega Sarandë, si njeri i LSI-së; ndërsa në anën tjetër, nipi i Kelit dhe i Bakos, Rigels Balili, po në emër të LSI-së, kandidon e më pas fiton bashkinë e Delvinës në zgjedhjet e fundit vendore.
Por të gjitha këto nuk gjejnë vend në denoncimet e PD-së.
Çështja e Kelmend Balilit nuk është vetëm një test për moralin politik të kësaj mazhorance, por dhe për atë opozitës, e cila vijon ende në luajë me dy porta, pa arritur të jep sinjale të një ere të re në moralin politik të saj.
Që do të thotë, se nëse nesër LSI vendos të riafrohet me PD-në dhe kjo e fundit vjen në pushtet, Kelmend Balili do jetë sërish drejtor Drejtorie, pavarsisht akuzave të rënda nga matanë kufirit. /tesheshi.com/
