Futbolli italian do të ketë një qasje “zero tolerancë” ndaj tifozëve racistë, duke përdorur teknologjinë për të ndihmuar në identifikimin e shkelësve dhe ndalimin e tyre nga stadiumet, ka njoftuar Serie A.
Çështja e abuzimit racist të lojtarëve ka qenë një nga temat kryesore në futbollin europian ditët e fundit, pasi sulmuesi i Real Madridit, Vinicius Jr, u vu sërish në shënjestër të një sulmi nga tifozët, këtë herë gjatë një ndeshjeje kundër Valencias.
“Në stadiume, si në shoqëri, ka një përqindje të caktuar të racistëve”, tha Luigi De Siervo, CEO i Serisë A. “Sot me teknologjinë dhe mikrofonat e stadiumit, ata mund të dëgjohen dhe ne mund t’i ndëshkojmë. Është një betejë. Si tumor duhet ta heqësh sistematikisht sepse rishfaqet”.
De Siervo kujtoi se Italia ndaloi të paktën 170 tifozë të Juventusit nga stadiumet pasi ata fyen Romelu Lukakun muajin e kaluar, duke e quajtur atë një shembull të “rrugës drejt zero tolerancës” për racistët.
Ndërkohë, edhe një herë trajneri i tij Carlo Ancelotti ka folur për rastin e ofendimeve të shpeshta ndaj Vinicius, duke pranuar se Spanja nuk është një vend racist, por se ka racizëm në të si dhe në vende të tjera. Ai përsëriti se Vinicius është viktimë.
“Vinicius është viktimë e asaj që po ndodh, nuk është ai fajtori. Viktima janë edhe tifozët, të cilët sillen në mënyrë të patëmetë. Kur them stadiumi ‘Mestalla’, nuk kam parasysh 46 mijë tifozë, por një grup që u soll shumë keq, si në ndeshjen kundër Mallorca-s apo Valladolidit”, tha Ancelotti.
Ai tha se ofendime raciste i ndodhin Vinicius, por edhe shumë të tjerëve. “Megjithatë, nuk është luftë, është sport. Dhe atje kemi një mundësi të madhe për t’i dhënë fund gjithë kësaj”, tha trajneri i Realit.
Sipas tij, tani është koha e duhur që autoritetet kompetente në Spanjë të marrin “masa drastike” në luftën kundër racizmit në stadiume. “Kjo mund të jetë një mundësi e shkëlqyer për të ndryshuar gjërat shpejt”, shtoi Ancelotti.
Policia spanjolle arrestoi tre të rinj të martën nën dyshimin se kanë abuzuar racialisht Vinicius nga tribuna e “Mestalla”-s gjatë ndeshjes së së dielës të xhiros së 35-të të kampionatit spanjoll ndërmjet Valencias dhe Realit. Klubi madrilen më pas paraqiti një kallëzim penal në prokurorinë spanjolle. /tesheshi.com/
