Eshtë shtyrë për më 7 maj dhënia e vendimit për ish-presidentin e rrëzuar të Egjiptit.
Muhammed Mursi dhe dhjetë të pandehur të tjerë janë akuzuar se i kanë dhënë Katarit dokumente sekrete. Pretendohet që këto materiale të përmbanin informacion sekret për sigurinë kombëtare dhe të jenë shkëmbyer me shërbimin e fshehtë të Katarit për miliona dollarë.
Shtyrja e vendimit u arsyetua me vazhdimin e konsultimeve.
Nëse Mursi shpallet fajtor dhe dënohet, ky do të jetë dënimi i katërt për të, ndërsa në tre gjyqe të tjera është dënuar me vdekje, me burgim të përjetshëm, e me 20 vjet burg.
Ai u dënua në 2015-ën me vdekje për shpërthim të burgut dhe për sulme mbi rajonet policore gjatë revoltës së vitit 2011.
Dënimin me burgim të përjetshëm do ta merrte në një gjyq tjetër, i akuzuar po për spiunazh.
Kurse në gjyqin e radhës do të dënohej me 20 vite burg për përplasjet jashtë pallatit presidencial në dhjetor të 2012-ës mes mbështetësve e kundërshtarëve të tij, gjatë të cilave u vranë 10 persona.
Muhammed Mursi do të detyrohej ta linte postin pas një puçi ushtarak në korrik të 2013-ës, vetëm një vit pasi mori drejtimin e vendit. /tesheshi.com/
