Një akt i paprecedent prishi shërbesën e së dielës në një kishë në qytetin Paddock të Pensilvanisë, SHBA, kur një person i armatosur tentoi të qëllonte pastorin, por fatmirësisht ky i fundit ia bllokoi armën.
Në videon që qarkullon në internet, 26-vjeçari Bernard Polite shihet duke hyrë në kishën e Vendbanimit të Jezusit, ndërsa pastori Glenn Germani po mbante predikimin e tij.
Ndërsa prifti protestant struket nga frika dhe vrapon për t’u strehuar pas foltores, personi i armatosur vazhdon të shkojë drejt tij, i vendosur për të përmbushur atë që kishte ardhur për të bërë. Fatmirësisht, në atë moment dhjaku Clarence McAllister nxiton drejt 26-vjeçarit dhe e ndalon atë, ndërsa dy burrat më pas e çarmatosin.
Stunning video from church service today.
This happened in Braddock, Pennsylvania.
Pastor survives after handgun jams and doesn't fire.pic.twitter.com/AAHQiDtFfU
— Citizen Free Press (@CitizenFreePres) May 6, 2024
“Unë mendoja se kjo nuk mund të ndodhte,” tha Germani për CBS News pas incidentit të tmerrshëm, duke shtuar se ai beson se Zoti ndërhyri dhe bllokoi armën.
Prifti e quajti hero dhjakun që vrapoi për ta ndihmuar pa u menduar, ndërsa tregoi se ka folur edhe me autorin pasi u arrestua nga autoritetet. “Më tha se ishte i ndikuar nga shpirtrat e këqinj dhe se kishte ardhur në kishë se donte të vriste dikë”, tha ai për 26-vjeçarin. Polite, i cili akuzohet për tentativë vrasje dhe vepra të tjera, i tha pastorit se po dëgjonte zëra dhe i kërkoi që ta falte.
Prifti përshkroi për rrjetin televiziv sesi sulmuesi i buzëqeshi para se të përpiqej ta vriste para vajzës së tij 14-vjeçare, e cila po ndiqte meshën nga stolat. “Ajo që më lëndoi më shumë ishte paniku i vajzës sime. Më duhej të dukesha e fortë për të, por ishte shumë e vështirë për mua”, theksoi prifti.
Sipas CBS News, policia po heton një vrasje në shtëpinë ku Polite jetonte para arrestimit të tij. Ende nuk janë bërë të ditura detajet e krimit dhe nuk dihet nëse personi i arrestuar është autori. /tesheshi.com/
