Një makinë e mbushur me lëndë shpërthyese është hedhur në erë këtë mëngjes në Gaziantep, një qytet pranë kufirit turk me Sirinë.
Shpërthimi ka ndodhur para ndërtesës qendrore të policisë, duke lënë të vdekur një polic, si dhe 13 të plagosur, nëntë prej të cilëve janë punonjës të policisë.
Shpërthimi ka qenë i fuqishëm, dhe është dëgjuar në një hapësirë të madhe, duke shkaktuar gjithashtu dhe dëme.
Ambulanca të shumta gjenden në vendngjarje, duke u ardhur në ndihmë të plagosurve.
Ky shpërthim është më i fundit në një seri incidentesh të tilla në Turqi, që kanë marrë shumë jetë njerëzish, posaçërisht në Ankara dhe në Stamboll.
Për të parandaluar diçka të ngjashme, në Adana janë anuluar sot festimet e 1 majit. Informacionet për kamikazë kanë sjellë anulimin e veprimtarive.
Në kufi me Sirinë, dhe e prekur drejtpërdrejt nga luftimet atje, Turqia përballet dhe me aktet e terrorit të PKK-së. Në lidhje me shpërthimin e sotëm në Gaziantep, ende nuk dihet autorësia. /tesheshi.com/
