Qeveria është përpjekur që altruizimin e pretenduar prej saj për fundvitin ta shpalosë dhe tek ata shqiptarë të cilëve ua ka ngordhur lopa gjatë 2016-ës, si pasojë e përmbytjeve si dhe e një sëmundjeje që i kaploi, e quajtur dermatoza nodular. Kjo u bë me dije nga vetë kryeministri Rama, gjatë prezantimit të skemës së përfitimit dhe shpërblimit për festat e fundvitit për disa kategori sociale. Njerëzit me lopë të humbur u përfshinë tek fondi i dëmshpërblimit për përmbytjet.
“Për 2498 familje të përmbytura në vite në 8 qarqe dhe 18 bashki do të bëhet dhënia e dëshmpërblimit të plotë, përkatësisht për 594 familje në Tiranë, 513 në Fier, 508 në Elbasan. 498 familje në Durrës ku përfshihen dhe familjet e përmbytura së fundmi në zonën e Krujës, 92 familje në Berat, 120 familje në Lezhë, 175 në Vlorë dhe 7 familje në Korçë”, u shpreh Rama që shtoi më pas se për fermerët do ketë një fond prej 3 milion dollarësh dhe do kompesohen për çdo lopë të ngordhur.
Më tej, ai njoftoi dhe në lidhje me fondin e ndarë për pensionistët, familjet në nevojë dhe personat me aftësi të kufizuara, ku vetëm për të parët rezultoi i garantuar gjeli i detit, çmimi i të cilit në tregun e gjësë së gjallë shkon nga 5 deri në 6 mijë lekë të reja.
“60 mijë lekë të vjetra çdo pensionisti për fundvit, që është shifra më e lartë e dhënë për ta dhe gati e barabartë me shifrën e rritjes së pensionit vitin e ardhshëm. Kjo nuk është pak, por as edhe aq shumë sa të jemi të kënaqur. Për herë të parë nuk ka qenë pjesë e këtij momenti të fundvitit, kategoria e personave me aftësi të kufizuar apo e familjeve ndihmë ekonomike. Do të jepet për çdo familje 20 mijë lekë ” deklaroi Rama. /tesheshi.com/
