Nga Bashkim Kastrati
Organizatat e dala nga lufta të UÇK-së sot, të përkrahur nga subjektet politike NISMA, AAK, Lëvizja Vetëvendosje dhe degët e PDK-së në Skenderaj e Drenas kanë protestuar para Qeverisë së Kosovës duke kërkuar që të mos themelohet Gjykata Speciale nga Kuvendi i Kosovës.
Në këtë protestë kanë marrë pjesë qindra qytetar për të protestuar kundër themelimit të Gjykatës Speciale si dhe kundër vendimit për “Grupin e Drenicës”.
Përfaqësuesi i organizatave të dala nga lufta e Ushtrisë Çlirimtare të Kosovës, Xhavit Jashari, ka thënë se qytetarët duhet të jetojnë të lirë në këtë vend dhe kjo gjykatë nuk duhet të votohet, sepse lufta e bërë nga pjesëtarët e saj ka qenë e pastër dhe e dinjitetshme.
“Gjykata Speciale po prishë dinjitetin e shumë qytetarëve të Kosovës. Kjo Gjykatë nuk duhet të votohet sepse është duke e shkelë dinjitetin e luftës tonë çlirimtare, luftë kjo e cila u bë më gjakun e shumë të rinjve, vajzave, djemve trima të Kosovës, dhe thuhet se nuk prek dinjitetin kjo Gjykatë”, ka thënë Jashari.
Ai ka thënë se kriminelët serbë duhet të dënohen e jo pjesëtarët e UÇK-së, ndërsa u bëri thirrje politikanëve që të mos bëhen padrejtësi të tilla duke votuar Gjykatën Speciale.
Ndërsa sekretari i OVL-UÇK-së, Faton Klinaku, ka thënë se Kosova kufizohet nga shtetet armike dhe se lufta e UÇK-së, është dashur t’i përgjigjet këtij terrori. Tutje, ai fajësoi edhe misionet ndërkombëtare, që sipas tij, UNMIK-u, në vend që të merret me krimet e serbëve që i kanë kryer në Kosovë, ai është marrë me burgosjen e luftëtarëve të UÇK-së. Ai gjatë fjalimit të tij i ftoi deputetët e Kuvendit të Kosovës që të mos e votojnë Gjykatën Speciale.
Ndërsa Smajl Elezi, nënkryetar i Organizatës së veteranëve të luftës në fjalën e rastit tha se po bëhet padrejtësi e madhe ndaj luftës së pastër të UÇK-së dhe Gjykata Speciale është një gjykatë e cila do të vazhdojë me rrugën e njëjtë si ajo e UNMIK-ut dhe EULEX-it. /tesheshi.com/
