Lideri i opozitës maqedonase Zoran Zaev, i ka premtuar eurokomesarit për zgjerim Johanes Han, se Lidhja Social Demokrate e Maqedonisë do të publikojë të gjitha informacionet që posedon, që janë dëshmi për kriminalizimin e pushtetit aktual. Sipas tij, ky është obligim ligjor dhe moral, në mënyrë që qytetarët e Maqedonisë të kuptojnë të vërtetën. “Këtë e bëjmë me të vetmin qëllim, kthimin e rendit kushtetues në vend dhe kthimin e lirisë dhe demokracisë”, ka thënë ai.
Nga LSDM u njoftua se tema kryesore e takimit mes liderit opozitar Zoran Zaev dhe eurokomesarit për zgjerim Johanes Han, ka qenë situata aktuale politike, pas aferës me përgjimin e rreth 20.000 qytetarëve të Maqedonisë, gjë e cila me javë po mban në ankth opinionin për përmbajtjen e informacioneve konfidenciale, të cilat opozita pretendon t`i ketë marë nga shërbimet sekrete.
“Skandali me përgjimin e 20.000 qytetarëve, përzierja e pushtetit në punën e gjygjësorit dhe prokurorisë publike, proçese të montuara politike, janë vetëm disa nga provat të cilat i posedojmë”, i ka thënë lideri opozitar, eurokomesarit Han.
