Partia Demokratike ka zyrtarizuar mëngjesin e sotëm emrin e deputetes së PD, Voltana Ademit si kandidate për Bashkinë e Shkodrës. Ademi ka qenë gjithashtu edhe prefekte e qarkut të Shkodrës në periudhën e qeverisë Berisha. Pas kësaj kandidature në “luftë” për mandatin 4 vjeçar të Bashkisë së Shkodrës do të jenë dy gra, duke kujtuar se Partia Socialiste ka konfirmuar më parë emrin e Keti Bazhdarit për bashkinë më të madhe të veriut, Shkodrën, për zgjedhjet lokale që do të mbahen në 21 qershor.
Voltana Ademi në fakt është një prej deputeteve më cilësore të qytetit të Shkodrës, Ajo vjen nga një përvojë në profil të dytë në pushtetin vendor jo vetëm në bashki, por edhe në qark. Përfaqëson pjesën qytetare dhe intelektuale të Partisë Demokratike por vënia e saj si kandidate zyrtare të opozitës në Shkodër ka ardhur pas një procesi të vështirë dhe me përplasje brenda PD-së jo vetëm lokale.
Njerëz shumë të afërt me ish-kryeministrin Sali Berisha, kanë qenë aktiv për të mbështetur Sokol Ramadanin, ish-drejtor i HE-ve në kasakadën e Drinit, ish-drejtor i OST dhe ish drejtor i ERE. I dërguari i kryesisë së PD-së, Arben Imami, ka udhëhequr një proces selektimi mjaft të komplikuar dhe me përplasja. Por një anë e kësaj zgjedhje është qëllimi për të sfumuar kandidaturën e PS-së, pra të një gruaje si Keti Bazhdari, por me një veçori, Ademi i përket besimit musliman ndërsa bazhdari atij katolik. Megjithatë gara është politike dhe në Shkodër pavarësisht veçorive komunitare, përballja përgjithësisht në vite ka qenë politik, përveç përdorimit që i është bërë nga politika kësaj pjese.
/tesheshi.com/
