Italia përkujton përvjetorin e pestë të shembjes së urës së Genoas-ës që vrau 43 persona në gusht 2018, me një ceremoni në vendin e fatkeqësisë dhe mesazhe nga liderët politikë.
“Ishte një fatkeqësi sa e rëndë aq edhe e paparashikueshme”, tha Presidenti i Republikës, Sergio Mattarella në mesazhin e tij.
“Koha që kalon nuk ul përgjegjësinë për atë që ndodhi”, shton ai, duke kërkuar nga drejtësia të përcaktojë “përfundimisht rrethanat, fajin, keqfunksionimet dhe mosfunksionimet” e personave dhe bizneseve të përfshirë në këtë tragjedi.
Gjykata e Genoa-s dërgoi 59 persona në gjyq në prill 2022. Rreth 170 dëshmitarë kanë dëshmuar që nga fillimi i gjyqit dhe janë zhvilluar më shumë se 80 seanca, por vendimi i shkallës së parë nuk pritet para vitit 2024.
Gjykata vendosi gjithashtu që kompania e autostradave Autostrade per l’Italia (ASPI), e cila menaxhonte atë urë, dhe kompania inxhinierike Spea, të dyja në atë kohë pjesë e grupit Atlantia të familjes Benetton, duhet t’i paguajnë shtetit 29 milionë euro në kuadër të një marrëveshje miqësore e lidhur mes prokurorisë dhe këtyre dy kompanive.
“Ka ende shumë pyetje në këtë tragjedi që mbeten pa përgjigje. Zemërimi, dhimbja, etja për drejtësi e familjeve të viktimave janë ndjenja të shenjta dhe meritojnë respektin tonë”, shkruan kryeministrja Georgia Meloni në një mesazh.
“Fatkeqësia mbetet një plagë e hapur”, tha Giovanni Totti, guvernator i rajonit Liguria ku ndodhet Genoa.
Më 14 gusht 2018, Ura Morandi, i cili ndodhet në një aks me rëndësi thelbësore për shkëmbimet mes Italisë jugore dhe veriore, u shemb, duke rrëmbyer dhjetëra automjete.
Tragjedia nxorri në dritë gjendjen e keqe të rrugëve, urave dhe hekurudhave në Itali, ku infrastruktura përballet me mungesë kronike mirëmbajtjeje dhe investimesh. /tesheshi.com/
