Ashtu siç qe paralajmëruar më herët, amerikanët i kanë ndërprerë bisedimet me rusët mbi konfliktin sirian, duke i akuzuar se nuk u janë përmbajtur angazhimeve të marrëveshjes së armëpushimit.
Zëdhënësi i Departamentit të Shtetit, John Kirby, tha përmes një deklarate: “Shtetet e Bashkuara po e pezullojnë pjesëmarrjen në kanalet dypalëshe me Rusinë…”
“Rusia dështoi fatkeqësisht t’u përmbahet angazhimeve të saj… Përndryshe, Rusia dhe regjimi sirian kanë zgjedhur të ndjekin një rrugë ushtarake.”
John Kirby e bëri të qartë se nuk ka qenë një vendim i lehtë, por vuri në dukje se Rusia dhe forcat e regjimit sirian kishin vënë në shenjë spitalet, e kishin penguar dërgimin e ndihmave humanitare në destinacion, siç qe rasti i goditjes së autokolonës me ndihma javë më parë.
Që prej përfundimit të armëpushimit, Halepi ka qenë vazhdimisht nën bombardime të furishme. Amerikanët patën paralajmëruar një javë më parë se do t’i ndërprisnin bisedimet nëse Moska nuk u jepte fund bombardimeve mbi Halep.
Rusia reagoi ndaj vendimit amerikan me këto fjalë, “Na vjen keq për këtë vendim nga Uashingtoni,” të thëna nga zëdhënësja e Ministrisë së Jashtme, Maria Zakharova. /tesheshi.com/
