Neroazurrët janë dorëzuar para skuadrës romake Lazio në shtëpinë e tyre, (1-2). Një ndeshje që u ofroi gjithçka të pranishmëve, gola, penalti, kartonë dyngjyrësh dhe shumë tensione ndërmjet skuadrave brenda fushës së blertë.
Mysafirët e nisën ndeshjen si më e mira, duke kaluar në epërsi qysh në minutën e pestë të lojës përmes mesfushorit Antonio Candrevas, që me një goditje jashtë zonës ka “fotografuar” portierin Handanoviç. Me rezultatin e diktuar nga sulmuesi italian përfundoi pjesa e parë e lojës.
Në pjesën e dytë, të besuarit e Roberto Mançinit shfaqën një tjetër fytyrë, duke bërë një lojë më ofensive, e cila solli rendimentin e saj në minutën e 61-të. Sulmuesi argjentinas, Mauro Icardi shfrytëzoi një maksimum një pasim të Ivan Perisiç, për të vendosur baraspeshën.
Gjithçka që kishin ndërtuar neroazurët e prishi Felipe Melo, që shkaktoi një penalti të panevojshme brenda zonës, gjë që ndëshkoi skuadrën e tij. Antonio Candreva pas dy tentimeve kalon “murin” Handanoviç, për t’i sjellë sërish epërsinë romakëve, por kësaj rradhe qe vendimtare dhe për ta fituar ndeshjen.
Nga fundi i takimit, braziliani problematik Filipe Melo tradhëtoi sërish bashkëlojtarët pasi u ndëshkua me karton të kuq për ndërhyrje skandaloze. Por më pas, edhe këtu pati një barazpeshë pas daljes me karton të kuq të Sergej Milinkoviç-Saviç.
Megjithatë, Interi përkundër humbjes vazhdon të jetë në krye të Serie A me 36 pikë, apo një më shumë se Fiorentina dhe Napoli. Kampioni Juventus është tri pikë larg. /tesheshi.com/
